17 mamyrda QR Aqparat jáne komýnıkasıalar mınıstri Dáýren Áskerbekuly Abaev «Keıki mergen» telehıkaıasynyń shyǵarmashylyq tobymen kezdesti. Bul týraly «Qazaqstan» teleradıokorporasıasynyń basshysy Erlan Qarın Facebook-tegi paraqshasynda habarlady, dep jazady Qamshy.kz aqparat agenttigi.

«Kezdesýde telehıkaıanyń basty rejıseri Murat Bıdosov senarıdiń alǵashqy nusqasymen, telexıkaıanyń túsirilim josparymen, kastıng nátıjelerimen tanystyryp ótti. Sondaı-aq, týyndynyń tarıhı keńesshisi Berik Ábdiǵalımen birge telehıkaıanyń senarıin jan-jaqty talqylap, oı-pikirlerimen bólisti. "Qazaqstan” teleradıokorporasıasynyń tapsyrysymen daıyndalyp jatqan bul týyndy Keıki batyrdyń ómiri men mergendigin sýretteıtin, bir ǵasyr burynǵy oqıǵalardy, qazaq halqynyń sol kezdegi jaǵdaıyn baıandaıtyn telexıkaıa bolmaq. Kezdesý nátıjesinde, Dáýren Áskerbekuly óz tarapynan senarı boıynsha eskertý men usynystaryn aıtyp, shyǵarmashylyq topqa sáttilik tiledi», - dep jazdy Erlan Qarın.

Budan buryn «Qazaqstan» teleradıokorporasıasy janynan qurylǵan kórkem telehıkaıalardy irikteý jónindegi Sarapshylar keńesi Keıki batyr týraly týyndy ıdeıasyn maquldaǵan bolatyn.  «Keıki mergen» telehıkaıasy boıynsha Keıki batyrdyń ómir súrgen ortasy týraly zertteýler jasap júrgen Shóptibaı Baıdildın men tarıhshy Berik Ábdiǵalı telehıkaıaǵa baılanysty oı-usynystaryn aıtyp, telehıkaıa rejıseri Murat Bıdosov usynǵan senarıdiń alǵashqy nusqasy talqylanǵan.

Keıki (Nurmaǵanbet) Kókembaıuly  (1871-1923) - 1916 jylǵy Torǵaıda bolǵan ult-azattyq kóterilisiniń batyry, ataqty mergen. Orta júz quramyndaǵy Qypshaq taıpasynyń Qulanqypshaq rýynan shyqqan. Qostanaı oblysy Amankeldi aýdanynyń Baıtýma qopasynda dúnıege kelgen. Jastaıynan ańshy, mergendigimen, ójettigimen aımaqqa tanylǵan. Onyń quralaıdy kózge atqan mergendigine saı el aýyzynda «Amangeldiniń kózi mergen, Keıkiniń qoly mergen» degen sıpattama saqtalǵan.

Keıki batyrdyń ádebıettegi beınesi Ǵabıt Músirepovtiń «Amangeldi» pesasynda Kete batyr bolyp beınelenedi. Maqan Jumaǵulovtyń «Qyran qazasy qıada» kitabynda jumbaqtalyp aıtylady. Keıkiniń qarasózde jasalǵan kórkem beınesi Aqan Nurmanovtyń «Qulannyń ajaly» atty romany edi. Alaıda keńes zamanynda shyqqan onda da aty anyq aıtylmaǵan.

Keıki beınesi óz atymen anyq aıtylyp, qanyq boıaý deregimen túgeldenip shyqqan shyǵarma Serik Turǵynbekulynyń «Keıki batyr» tarıhı dastany (Almaty, «Bilim», 2001). Keıki batyr Kókembaıulynyń urpaqtary Qostanaı oblysynyń Amangeldi aýdanyndaǵy Aqtas, Tasty eldi mekenderinde turady. 1996 jyly Keıki batyrdyń 125 jyl tolýyna baılanysty as berilip, eskertkish ornatyldy.