Ýkraınada Lenınniń 1500-ǵa jýyq eskertkishi alynyp, myńnan asa eldi mekenniń ataýy ózgerdi. Bul týraly Ýkraına prezıdenti Petr Poroshenko saıası repressıa qurbandaryn eske alýǵa arnalǵan rásim barysynda málimdedi.

«2013 jyldyń aıaǵynda Ýkraına kartasy oqýlyqtarda Sovet odaǵy komýnıstik partıasynyń tarıhyna mysal retinde ǵana berilip júrdi. Bizdiń eldi mekenderimiz Lenın men onyń jaqtastarynyń mazaryna aınalǵandaı edi. Qazirgi ýaqytta 52 myń kóshe men myńǵa jýyq eldi mekenniń ataýy ózgerdi. Lenınniń myńnan asa eskertkishi alyndy», - dep habarlady Ýkraına prezıdenti.

Poroshenkonyń aıtýynsha, mundaı sheshim «Komýnıstik jáne ulttyq-sosıalıstik totalıtarlyq rejımderdi aıyptaý týraly» zańnama aıasynda júzege asqan.

Bykıvná ormany – ýkraın, polák jáne ózge de ulttardyń repressı qurbandaryn eske alý rásimderin oryndaıtyn ortaq orny. «Stalınniń buıryǵymen atylǵan myńnan asa ult ókilderiniń zırattaryna basymyzdy ıip, gúl shoqtaryn qoıa otyryp, «Biz, ýkraındyqtar, totalıtarlyq rejim barysynda zardap shekken halyqtarmen yntymaqtastyǵymyz berik ekenin málimdeımiz», - dedi Poroshenko.

Sharaǵa qatysýshylar saıası repressıa qurbandaryn 1 mınýttyq únsizdikpen eske aldy. Petr Poroshenko men onyń jary Marına Poroshenko Baýyrlar zıraty men Ortalyq memorıaldy eskertkishine, sonymen qatar Memorıaldyń polák bóligine gúl shoqtaryn qoıdy.