«Sıfrly Qazaqstan» Memlekettik baǵdarlamasy jáne «Qazaqstannyń kıeli jerleriniń geografıasy» aıasynda Qyzylorda oblysy tarıhı-mádenı murasynyń 3D-formatty ınteraktıvti kartasy jasaqtalmaq. Bul týraly Qyzylorda oblysynyń ákimi Qyrymbek Kósherbaev Ortalyq komýnıkasıalar qyzmetinde «Rýhanı jańǵyrý» baǵdarlamasynyń aımaqta oryndalý barysy týraly ótken baspasóz konferensıasynda málimdedi.
Interaktıvti karta 2018 jyldyń aıaǵyna deıin jasaqtalady. Ol respýblıkalyq jáne jergilikti mańyzy bar 150 eskertkishti qamtıtyn bolady.
IýNESKO uıymy Búkilálemdik murasynyń aldyn-ala tizimine oblystan 9 eskertkish eńgizildi: Syǵanaq, Jankent, Kesken-kúıik, Shirik-Rabat, Bábish mola, Jent, Balandy, Jetiasar mádenıetiniń eskertkishteri men Saýysqandyq petroglıfteri enip otyr.
Aımaqta «Qazaqstannyń kıeli jerleriniń geografıasy» baǵdarlamasynyń birinshi kezeńi iske asty. Onyń aıasynda tizimge 12 jalpyulttyq jáne 35 oblystyq tarıhı-mádenı eskertkish eńgizildi. Qazaq handyǵynyń tuńǵysh astanasy Syǵanaq pen Jankent, Sortóbe, Jent, Shirik-Rabat pen Kerderi kesenesiniń arheologıalyq zertteýleri júrgizildi.
Sonymen qatar, otandyq jáne sheteldik týrıser Qarmaqshy aýdanyndaǵy Qorqyt ata memorıaldyq kesheni men etnoaýylǵa úlken qyzyǵýshylyq bildirip jatyr. Esterińizge sala keteıik, memorıaldyq keshen 1980-shi jyldary túrki áleminiń abyzy Qorqyt atanyń qurmetine salynyp, 2014 jyly QR Prezıdenti Nursultan Nazarbaevtyń tapsyrmasymen nysannyń tolyq rekonstrýksıasy jasalyp, zıarat etý ortalyǵy salyndy. Keshen «Batys Eýropa-Batys Qytaı» halyqaralyq avtojolynyń boıynda ornalasqan, sondyqtan kelip jatqan týrıser aǵyny, ásirese «EKSPO-2017» kórme jumysynyń aıasynda, únemi artyp keledi.
