Almaty jurtshylyǵy alǵashqy teńgeniń dızaınyn jasaǵan avtorlardyń biri Tımýr Súleımenovti baqılyq saparǵa shyǵaryp saldy. Qaraly jıyn Á.Qasteev atyndaǵy mýzeıde ótti.
Marqumdy baqılyq saparǵa shyǵaryp salýǵa barlyq áriptesteri, týystary, óner salasynyń ókilderi, Almaty ákimi, QR Ulttyq bankiniń ókilderi jınaldy.
«Aǵamyzdyń qaıtys bolǵany týraly sýyq habardy estip kesheli beri otbasyna qoldaý kórsetip jatyrmyz. Aǵamyzben sońǵy úsh jylda ákim retinde tyǵyz jumys istedim. Almatynyń búgingi kelbeti, damý tujyrymdamasyna úles qosqan adam. Bul kisi Elbasynyń qolynan »Parasat» ordenin alǵan, QR eńbegi sińgen óner qaıratkeri. Ol kisiniń murasy qanshama jyl halyqqa qyzmet etedi. Jaqsynyń aty umytylmaıdy degen sóz bar», - dedi Almaty qalasynyń ákimi Baýyrjan Baıbek.
Odan keıin sóz alǵan mádenıettanýshy-ǵalym, memleket jáne qoǵam qaıratkeri Murat Áýezov Tımýr Súleımenovtiń otbasy týraly estelikterimen bólisti.
«Tımýr Súleımenov óner, dızaın salasynda júrgen jandardyń biregeıi edi. Búgin meniń baýyrymdy óner ordasynan shyǵaryp salyp jatyrmyz. Ol eldiń adamy jáne memleketshil, ultjandy azamat bolatyn. Oǵan talaı kýá bolǵamyz. Onyń anasy Marıam apaı ómirdiń qansha qıynshylyǵynan ótip, altyn asyqtaı azamattardy tárbıelep ósirdi. Ol - úlken erlik. Ol kisiniń árbir balasy halyqtyń ulyna aınaldy. Búgin Tımýrdy aqtyq saparǵa shyǵaryp salýǵa kelgen tulǵalardyń barlyǵy adamı qundylyqtarǵa adal qyzmet etken urpaqtyń ókilderi», - dedi Murat Áýezov.
Tımýr Súleımenov 10 mamyrda 75 jasqa qaraǵan shaǵynda meńdegen aýrýdan kóz jumǵan edi.
Tımýr Bımashuly Súleımenov 1943 jyly 14 aqpanda Ońtústik Qazaqstan oblysynyń Qarabulaq aýylynda týǵan. 1965 jyly - Lenıngrad qurylys-ınjenerlik ınstıtýtyn, 1970 jyly Qazaq polıtehnıkalyq ınstıtýtyn (1970) bitirgen. Tımýr Súleımenov - sáýletshi, Qazaq bas sáýlet-qurylys akademıasynyń qurmetti profesory. Halyqaralyq óner akademıasynyń akademıgi, QR Kórkemóner akademıasynyń qurmetti akademıgi, Qazaqstandyq dızaın mektebiniń negizin salýshy. Almaty oblysyndaǵy «Cherkassk qorǵanysynyń batyrlaryna» memorıaldyq kesheniniń; Túrkistan qalasyn qaıta qurý jáne tarıhı-mádenı týrısik ortalyqqa aınaldyrý jobasynyń avtory. Shymkent jáne Janatas qalalaryn salýdyń bas josparlaryn ázirleýge, Túrkistan qalasynyń tarıhı aımaǵyn qalpyna keltirýge, Q.A. Iasaýı kesenesi aınalasyndaǵy tarıhı aımaqty qaıta qurý jobasyna qatysqan. «QR Respýblıkalyq stıli» keshendi memlekettik dızaın-baǵdarlamasynyń jetekshisi; ulttyq valúta dızaınyn jasaý, jobalaý, QR Qarýly Kúshteri dızaın-baǵdarlamalaryn jasaýmen aınalysqan jumys toptarynyń jetekshisi. 1965 jyldan - «Qazqalaqurylysjobalaý»» jobalaý ınstıtýtynyń sáýletshisi, Almaty qalasy Kalının aýdanynyń bas sáýletshisi, 1968 jyldan - «Almaatagıprogor» ınstıtýtynda sáýletshiler tobynyń jetekshisi, «Qazqalaqurylysjobalaý» ınstıtýtynyń jobalar boıynsha bas sáýletshisi, 1982 jyldan - Qazaqstannyń Kórkemdik qorynyń bas sýretshisi, qalalyq ortanyń dızaıny sheberhanasynyń jetekshisi, 1987 jyldan - «Qazaqstan Dızaınerler odaǵy» RQB basshysy qyzmetin atqarǵan.
Marqumnyń artynda jary, 2 balasy men 2 nemeresi qaldy.
