Oqýshylar saraıynyń aldyndaǵy alańda Medeý aýdany­nyń ákimi Erjan Jylqybaevtyń kezekti kóshpeli qoǵamdyq kezdesýi ótti. İs-shara bılik pen halyqtyń arasyndaǵy baılanysty nyǵaıtý, kúndelikti máselelerdiń durys sheshimin tabý jáne aýdanda atqary­lyp jatqan jumystarmen turǵyn­dardy tanystyrý maqsatyn kózde­di. Qoǵamdyq qabyldaýǵa Medeý aýdanynyń ákimi, aýdan ákiminiń orynbasarlary, Almaty qalasynyń basqarma ókilderi, jergilikti polısıa qyzmetiniń ókilderi, sonymen qatar Medeý aýdany boıynsha Tótenshe jaǵdaılar bólimi, «Nur Otan» partıa­synyń aýdan­dyq fılıaly, aýdandyq bilim berý bólimi, aýdandyq Halyqqa qyzmet kórsetý ortalyǵy men basqa aýdandyq qurylym ókilderi qatysty.

– Kóshpeli qoǵamdyq qabyldaý bılik pen halyqtyń arasyndaǵy baılanysty nyǵaı­týdyń, halyqpen tyǵyz qarym-qatynas jasaýdyń tıimdi tásili. Bul izgi sharany turǵyndarmen tyǵyz baılanys jasaý, qoǵamǵa ashyqtyǵymyzdy kórsetý maqsatynda uıymdastyramyz. Kóbinese azamattar aýdandyq qurylym ókilderin kabınetterinen taba almaı jatatyn jaǵdaı­lar bolady ǵoı. Al bul is-sharada aýdandyq qurylym ókilderi jurtshy­lyqpen júzdesip, turǵyndardy tolǵandyr­ǵan ózekti máselelerdi sheshý úshin halyq­tyń aldyna ózderi barady. Halyqqa ashyq­tyǵymyzdy kórsetetin bul tájirıbeni engizgenimizge eki jyl boldy. Osy ýaqyt aralyǵynda eki jarym myń adamdy qabyldadyq. Shara sheńberinde aýdan turǵyndaryn mazalaǵan máselelerdiń 90 paıyzdan astamy sheshimin tapty. Jalpy, aýdan turǵyndaryn sý, jaryq, jol, aýla­lardy jóndeý máseleleri tolǵandyrady. 2  jylda aýdanymyzda 2,5 mlrd. teńgege 200 aýla jóndeýden ótkizildi. Medeý aýdanyn­daǵy 512 aýlanyń 300-den astamyna eki jylda jóndeý jumystary júrgizilip, retke keltiriledi. Búgingi tańda 30 myń halyq turatyn «Dýman» yqshamaýdanyn sýmen, káriz júıesimen qamtamasyz etý jumys­taryn bıylǵy jyldyń sońyna deıin bitiremiz. Bıyl aýdandaǵy 65 kóshege jaryq júıesin júrgizý josparlanǵan.  Memleket­tik Ortalyq murajaıy skveri men Jýr­nalıster skveri, sonymen qatar, aýdany­myzdaǵy 22 jol jóndeýden ótkiziledi. Biz kóshpeli qoǵamdyq qabyldaýǵa kelgen aýdan turǵyndarynyń ótinishterin muqıat tyńdap, túıtkildi máselelerdiń sheshimin tabýǵa tyrysamyz. Shara barysynda búgingi tańda aýdanda atqarylyp jatqan irgeli isterimiz týraly jurtshylyqqa jan-jaqty aqparat berýdi maqsat qylamyz. Jyldyń sońyna deıin barlyq yqshamaýdandarda qoǵam­dyq qabyldaý ótkizip, aýdan turǵyn­darynyń tilegin tyńdaımyz. Kelesi kezekti qoǵamdyq qabyldaý maýsym aıynda №2 emhanada ótkiziletin bolady. Kóshpeli qoǵamdyq qabyldaý ótetindigi týraly turǵyndarǵa aldyn-ala ınstagram arqyly únemi habarlap otyramyz, – dedi Medeý aýdanynyń ákimi Erjan Jylqybaev.

Kóshpeli qoǵamdyq qabyldaýǵa arnaıy kelgen adamdardyń arasynda «Dýman» yqsham­aýdanynyń turǵyny Rahymhan Núptekeev te bar.

– «Dýman» yqshamaýdanynda №172 mektep-gımnazıasy bar. Negizi myń oqýshy bilim alýǵa laıyqtalǵan oqý ornynda búgin­gi tańda 2100 shákirt oqyp júr. «Dý­man­daǵy» halyq sany kúnnen-kúnge ulǵaıý­da. Mekteptegi oqýshylar sany da jyldan-jylǵa artyp keledi. Osyǵan baı­lanysty 3 jyldan beri yqshamaýda­ny­myzdyń turǵyndary aýdan basshylyǵyna taǵy bir mektep salyp berý týraly ótinish aıtyp júr. Negizi, qala ákimi men aýdan ákiminiń turǵyndarmen eseptik kezdesýinde bul másele aıtylǵan bolatyn. Men «Dý­mandaǵy» Ardagerler keńesiniń tóraǵa­symyn. Bul kóshpeli qoǵamdyq qabyldaýǵa turǵyndardyń tilegin arqalap kelgendikten, aýdan basshysymen tikeleı tildestim. Aýdan ákimi mekteptiń janyna salynatyn qosymsha ǵımarattyń qurylysy bıyl bas­talyp, kelesi jyly aıaqtalatynyn aıtty. Dýmandyqtardy qýanyshqa bóleıtin bul kúndi bárimiz asyǵa kútetin bolamyz, – deı­di atalǵan yqshamaýdanda turatyn ardager.

Al aýdannyń endigi bir turǵyny Gúljan Rahmanbekova balalardyń qaýipsizdigine baılanysty mazalaǵan máselesin jetkizdi.

– Men Oqýshylar saraıynyń janyn­daǵy kópqabatty úılerdiń birinde turamyn. Kúnde keshke otbasymyzben birge Oqýshy­lar saraıynyń aldyndaǵy alańda serýen­deýdi unatamyz. Aýdan turǵyndary da osy jerge kelip, tabıǵat aıasynda taza aýada tynyǵady. Keıbireýler tumyldyryqsyz ıtterin ertip qydyryp júredi. Shynyn aıtqanda, biz bala-shaǵamyzdyń qaýipsiz­digi­ne qatty alańdaımyz. Keıbir alyp deneli ıtterdiń ıeleri «ol tistemeıdi, qoryq­pańyzdar» dep bizge kepildik berse de, ol báribir janýar emes pe? Ári ıt júrip ótken jer taza bolmaýy da múmkin, ol jerlerde balalardy oınatqymyz kelmeıdi. Osy máselege baılanysty tıisti sharalar qolda­ný qajettigi týraly ótinishpen keldim, – deıdi aýdan turǵyny.

Shara sheńberinde turǵyndar tilegi tyń­daldy. Túsken ótinishterge tıisti jaýaptar berildi.