Qazaqstan Jazýshylar odaǵynda Alash arystary men asharshylyq qurbandaryna arnalǵan "Án - minájat, jyr - duǵa" atty rýhanı kesh ótti.
Keshke Qazaqstan Jazýshylar odaǵynyń Basqarma tóraǵasy Ulyqbek Esdáýlet, QR Eńbek sińirgen qaıratkeri, jazýshy Smaǵul Elýbaı, jazýshy, dramatýrg Sofy Smataev, Halyqaralyq "Alash" ádebı syılyǵynyń ıegeri, aqyn Járken Bódeshuly, aqyn Jaras Sársek, alashtanýshy, jýrnalıs Bolat Múrsálim, t.b. tanymal tulǵalar qatysty. Keshti Jazýshylar odaǵy Tóraǵasynyń orynbasary, aqyn Baqyt Bedelhan júrgizdi.
Alǵash bolyp sóz alǵan Qazaqstan Jazýshylar odaǵynyń Basqarma tóraǵasy Ulyqbek Esdáýlet: "Bul - bir jaǵynan jazyqsyz qurbandardy qasterleý kúni bolsa, bir jaǵynan olardy eske alyp, aza tutý kúni. Osy qasıetti qara shańyraq - Jazýshylar odaǵynda atylǵan arystarymyzdyń tabanynyń izi, estelikteri qalmasa da, rýhymen demep, qoldap turǵatyndaı. Óıtkeni, qazaqtyń sol úlken arystarynyń birazy osy Jazýshylar odaǵyn qurýǵa atsalysqan adamdar qatarynan. Keńes odaǵynyń qyzyl terrorynyń jalǵasy retinde "asyra silteý bolmasyn, asha tuıaq qalmasyn" dep halyqty ashtyqqa, qyrǵynǵa ushyratqany, odan bergi jyldarda Alashtyń ardaqty arystaryn shetinen qurbandyqqa shalǵany, jazyqsyz qýǵyn-súrginge ushyratqany, halyqtyń qaımaqtaryn qalqyp alyp, qalǵanyn tentiretip jibergendeı zobalań kúıge túsirgeni áli álemdik tarıhtan óz baǵasyn alǵan joq. Buryn-sońdy bolmaǵan qyrǵyn kúni belgilenip, taǵzym etetin, eske alatyn, aza tutatyn, ardaqtaıtyn, qasterleıtin ataýly kúndi arnalǵanynyń ózine biz ishteı shúkirshilik etemiz", - dedi.
Kezekti sóz alǵan jazýshy Smaǵul Elýbaı: "Resmı túrde "31 mamyr qýǵyn-súrgin qurbandaryn eske alý kúni" dep ataldy. Men osy ataýdyń ózinde bir shıkilik bar ekenin aıtqym keledi. Asharshylyq - elý jyl boıy sovet ıdeologıasyn úrkitken sóz. Táýelsiz Qazaqstan tusynda da sol zańdy qabyldaıtyn kesheni komýnıserimiz úrkip, asharshylyq degen sózdi alyp tastaǵan bolatyn. Bul 1995 jyly bolǵan oqıǵa. Sóıtip, qýǵyn-súrgin qurbandaryn ǵana qaldyrdy. Bul asharshylyqtan ketken 4 mln. halyqtyń arýaǵyna jasalǵan qıanat boldy. Menińshe, bul másele qaıta qaralýy tıis. Jáne bul apattyń aty "Asharshylyqtan qyrylǵan halyqtyń jalpyulttyq aza tutý kúni" dep atalýy kerek", - dedi.
Alashtanýshy-jýrnalıst Bolat Múrsálim: "Maǵjannyń "Sabataev Satylǵan, kóshede júrip atylǵan" degen óleńi bar. Sol "Satylǵan Sabataev" osy Jetisý óńirinen shyqqan alashordashy, Alashorda úkimetiniń múshesi bolǵan azamat. Sol kisi Jarkentte oq tıip, qaza bolǵan. Maǵjannyń bul óleńi tegin óleń emes. Óıtkeni, sol kezeńde qazaqtyń qaı zıalysy bolsyn, totalıtarlyq júıeniń saqtap otyrǵan oǵy bolǵan. Sovet úkimeti eń alǵash qurylǵan kúnnen bastap, qandy úkimet bolatyn. Bılikke kelýiniń ózi zańsyz, qandy jolmen kelgen. Lenın de, Stalın de sonyń bárin zańdastyryp otyrǵan. Qazaq zıalylarynyń arasyndaǵy toptasý, teketires repressıanyń basy emes edi. Ol jaı ǵana kez kelgen halyqta bolatyn óz zıalylarynyń arasynda bolatyn teketires edi. Al onyń uıymdastyrýshysy - Máskeý bolatyn", - dedi.
Kesh barysynda Erkin Shúkiman, Sáýlejan syndy tanymal ánshiler Alash arystaryna arnalǵan ánderdi oryndasa, Baqyt Bedelhan, Jaras Sársek, Baǵdat Múbarak syndy aqyndar óleńderin oqydy.
Kesh sońynda Qazaqstan Jazýshylar odaǵynyń jańa músheleri - Murat Shaımaran, Sáken Sybanbaı, Jańylhan Asylbekova, Ardaq Nurǵazy, Dáýren Qýat, Qoıshybek Múbarak, Dmıtrıı Ivanov, Yrysbek Dábeı, Erbolat Tursynbek, Toqtaráli Tańjaryq, Darhan Beısenbekuly, Maqsat Ramazanulyna kýálik tabystaldy.
