Búgin Almatyda 1931-1933 jyldarǵy asharshylyq qurbandarynyń eskertkishine gúl shoqtary qoıyldy, atalǵan sharaǵa qoǵam qaıratkerleri, repressıa men asharshylyq qurbandarynyń urpaqtary, úkimettik emes uıymdar ókilderi jáne qala jastary qatysty. Bul jaıynda Qamshy.kz aqparat agenttigi Almaty qalasy ákimdiginiń baspasóz qyzmetine silteme jasap habarlaıdy.
Almaty ákimi Baýyrjan Baıbek byltyr Memleket basshysynyń tapsyrmasymen qala ortalyǵynda asharshylyq qurbandaryna eskertkish ornatylǵanyn, onda qolyna aryp-ashqan, ólimshi háldegi balasyn ustaǵan ana beınesindegi qazaq halqynyń aýyr taǵdyry beınelegenin atap ótti.
«Tarıhtyń sherli únin jetkizgen bul eskertkish – qalamyzdyń kıeli nysandar tizimine endi. Bul – Elbasy atap ótkendeı, «asharshylyqta qurban bolǵan mıllıondardyń rýhyna búgingi býynnan taǵzym jáne keler urpaq ata-babalarynyń qandaı qasiretterdi bastan ótkergenin bilip júrýine qajet taǵylym», - dedi Baýyrjan Baıbek.
Ol sol bir qasiretti jyldary qazaq halqynyń óz eńsesin tik kóterip qana qoımaı, qazaq topyraǵyna jer aýdarylǵan ózge ult ókilderin baýyryna tartyp, qamqorlyǵyna alǵanyn atap ótti.
«Al búgin, biz eń qundy baılyǵymyz Táýelsizdigimizdi alyp, sónýge aınalǵan shyraǵymyzdy qaıta jaqtyq. Bir shańyraqtyń astynda 100-den astam ulystar uıysqan Qazaqstan – beıbitshilik pen birliktiń mekenine aınaldy. Keshegi arystarymyzdyń asyl armany oryndalyp, el tutqasyn ustaǵan Elbasy men eńseli elordasy bar álem tanyǵan qýatty el boldyq», - dep atap ótti Almaty ákimi.
Eske salsaq, «Qaraǵaıly» skverinde 1931-1933 jyldarǵy asharshylyq qurbandaryna eskertkish ornatylǵan bolatyn. Bıiktigi úsh metrlik qola men granıtten quıylǵan skýlptrde ashtyqtan ólimshi bolǵan balasyn keýdesine basqan ana beınelengen. Qazaqstanda 1918 jyldan 1933 jyldar ishinde túrli málimetter boıynsha úsh mıllıonnan astam adam jappaı qyrylǵan, sonyń ishinde 1931 jyldan 1933 jyl aralyǵynda 1 mln. 700 myńǵa jýyq adam qurban bolǵan. 1937-1938 jyldary 100 myńnan astam qazaqstandyq qurbandyqqa ushyraǵan.
Qalada ótken jyly birqatar kóshelerge ultymyzdyń maqtanyshyna aınalǵan batyrlardyń, aqyndardyń, jazýshylardyń esimderi berildi. Olardyń arasynda Smaǵul Sádýaqasuly, Teljan Shonanuly, Jansha Dosmuhamedov, Talǵat Bıgeldınov, Saǵadat Nurmaǵanbetov, Tumanbaı Moldaǵalıev, Qadyr Myrzalıev, Ámına Ómirzaqova, Maqash Tátimov, Gerold Belger bar.
