Men eshqandaı korolińnen de, patshańnan da, prezıdentińnen de qoryqpaı, betine aıtatyn adammyn. Jáne onyń ústine ýaıymshyldyǵym taǵy bar. Ánebir kezde el ishinde Nurekeń prezıdenttik taǵyn tastap, bireýge tapsyryp ketpekshi eken degendi esitgende eki-úsh kún saryýaıymǵa salynyp, qyzýym kóterilip aýyryp ta qaldym. Sóıtip júrgende joǵarydaǵylarmen tyǵyz baılanystaǵy bir tanysym kelip:
–Qudaı berdi! Aq túıeniń qarny jaryldy! Aspandy basqan bult ashyldy, sen de eńseńdi kóter,-demesi bar ma?!
–Ne boldy, aıtsańshy tezirek.
–Elbasymyz ornynan ketpeıtin bolypty. Ony aıtasyń-aý, kózim tirisinde bul orynnan ketpeımin depti. Tipti, 2050 jylǵa sheıin otyra beremin depti, –deıdi ol júregi jaryla qýanyp. Sóıtedi de betimnen qaıta-qaıta súıedi. Meniń de qýanyshymda shek joq. Aýrýymdy umytyp 6 balammen áıelim ekeýmizdi qosqanda 8 adam turatyn bir bólmeli jekeshelendirgen jataqhanamnyń aǵash edenin dúrsildete tepkilep bıleı berippin. Kenet áldebir sýyq oı mıymdy solq etkizip soǵyp ótkende basym keýdeme túsip sylq etip otyra kettim. Dosym «ne boldy, ne boldy?»,-dep sasqalaqtap júrip betime muzdaı sý sepkende baryp esimdi jıdym. Sonda aıtqanym mynaý boldy:
–Dosym! Men olaı-bulaı bola ketsem mynany esińe saqta! Bizdiń Elbasymyz Memlekettik Ánuranymyzdy marqum Jumeken Nájimedenov ekeýi qatar otyryp jazyp shyqqan úlken aqyn adam. Al naǵyz aqyn sezimge berilgish, keıde qaıdaǵy joqty qoıyp qalyp aıta salatyn, jany názik adam. Elbasymyz da sondaı, keıde ýádeni úıip-tógip berip-berip tastaı beredi de onysy oryndalǵan-oryndalmaǵanymen isi bolmaı kelesi bir joba, jospar, usynys, birneshe qadam degenderdi bastaı jóneledi. Eger sol ádetine basyp prezıdenttikten ketemin dep taǵy bir ret aıta qalsa men ne isteıtinimdi aıtaıyn ba?
–Al, aıtshy!
–Eger Elbasymyz ornynan ketemin degenin estisem, sol boıda eger ol jumysta otyrsa kabınetine, al úıinde tamaq iship otyrǵan bolsa úıine kirip baramyn da áýeli oryssha, «Zdravstvýıte», sosyn aǵylshynsha «Helloý», sosyn eń sońynda «Assalaýmýaleıkým!» dep úsh tilde amandasyp alamyn. Sosyn ol kisiniń betine týra qarap turyp: bylaı deımin: Qurmetti Elbasy! Búgin men óte bir sýyq habar estidim. Sen prezıdenttikten ketemin depsiń. Sen degenime keshir, óıtkeni, biz Alladan tilek tilegende Oǵan da «Eı, Alla! Sen eń ulyqsyń» dep bastaımyz ǵoı. Al endi álgi prezıdenttikten ketemin, jasym keldi, ornymdy endi 26 jyldan beri orys tiliniń shańyna da ilese almaı qur súlderi kele jatqan qazaq tilin shyn memlekettik til dárejesine kóteretin, el-jer baılyǵyn ınvestısıa degendi jeleý etip kim kóringenge berip qoımaıtyn, Reseıdiń zymyrandaryn Qazaqstanda synaýǵa nemese osynda jarýǵa jol bermeıtin, is qaǵazdaryn kórshiles respýblıkalardaǵydaı tek memlekettik tilde (qazaq tilinde) júrgizetin, óziniń de, úkimettiń de, parlamenttiń de, keńes, máslıhat, májilis sıaqty jıyndaryn tek qazaq tilinde ótkizetin, birnárse istemek bolsa Pýtınge jaltaqtamaı, naǵyz azat el saıasatyn júrgizetin, qysqasy osynaý qazaq eliniń ıesi qazaq qana deıtin, eń áýeli ata-babasy osy el, osy jer úshin qany men terin ǵasyrlar boıy qatar tókken qazaq halqynyń jaǵdaıyn oılaıtyn, tili, ımany, tárbıesi naǵyz qazaq balasyna berip ketemin deseń onda kelisemin, –deımin. Óıtpeıtin bolsań, ekeýmiz basqasha sóılesetin bolamyz. Biraq sen ázir ketpe. Osydan ketemin dep taǵy bir aýyz sóz aýzyńnan shyǵatyn bolsa bar ǵoı, eldi mıtıńige kóteremin. «Do svıdanıa», «Gýd baı», «Jolyqqansha» dep úsh tilde qoshtasyp esikti tars jaýyp shyǵyp ketemin. Men álginde aıttym ǵoı, kim-kimniń de betine týra aıtamyn dep. Al ol kisi ádil sózdi, ne nárseni de betke aıtqandy jaqsy kóredi. Ózi de kóbine qazaqtarǵa qarap jekirip batyl aıtady. Qane, men sıaqty batyr bolsańdar, bireýiń aıtyp kórińdershi Mine, dosym! Men olaı-bulaı bop ketsem osy aıtqandarymdy esińe saqta dedim de qaıtadan áldebir qalyń uıqyǵa kettim. Bul uıqydan 2050 jylǵa sheıin oıana qoıýym da ekitalaı-aý. Do svıdanıa, Gýd Baı, Saý bolyńdar kazah, kazakh, qazaqtar!
Myrzan KENJEBAI
(ázil-syr)
