31 mamyrda QR Parlamentiniń Senaty «Qazaqstan Respýblıkasynyń keıbir zańnamalyq aktilerine komersıalyq emes uıymdardyń qyzmeti máseleleri boıynsha ózgerister men tolyqtyrýlar engizý týraly» zań jobasyn qabyldady.
Zań jobasyn depýttarǵa QR Din isteri jáne azamattyq qoǵam mınıstri Darhan Káletaev tanystyrdy.
Jobanyń negizgi maqsaty úkimettik emes uıymdardyń memlekettik áleýmettik tapsyrys, granttar men syılyqaqy salasyndaǵy qyzmetin retteıtin zańnamany jetildirý bolyp tabylady.
Zań jobasyna birqatar jańa tolyqtyrýlar engiziledi. Atap aıtqanda, memlekettik áleýmettik tapsyrys aıasynda ÚEU kórsetiletin qyzmetterdiń mazmuny, sharttary men sapasyna qatysty biryńǵaı talaptardy engizý usynylyp otyr. Sonymen qatar, joba tıimdiligin jáne ÚEU qyzmeti sapasyna halyqtyń qanaǵattaný dárejesin anyqtaý úshin memlekettik áleýmettik tapsyrys nátıjesin baǵalaýdy engizý usynylýda.
Sondaı-aq, mınıstrlik syılyqaqylar men granttar berýdiń jańa mehanızmderin usynady. Mınıstr D.Káletaevtiń aıtýynsha, syılyqaqy almaǵan úkimettik emes uıymdar, jylda syılyqaqy alý úshin ótinim bere alady. Qoldanystaǵy zańnama boıynsha konkýrsqa qatysýǵa ótinim berip, syılyqaqy ala almaǵandar ÚEU úsh jyl boıy konkýrsqa qatysa almaıdy.
Sonymen qatar, zańnamaǵa sáıkes, jergilikti atqarýshy organdar úkimettik emes uıymdarǵa granttyq qarjylandyrý salasyndaǵy operator - «Azamattyq bastamalardy qoldaý ortalyǵy» KEAQ arqyly
granttar berý múmkindigine ıe bolady.
Zań jobasynyń sheńberinde «azamattyq qoǵamnyń damýyna járdemdesý, onyń ishinde úkimettik emes uıymdardyń turaqtylyǵyn arttyrý jáne áleýetin kúsheıtý» boıynsha jańa baǵyt engiziledi.
Zań jobasyna engiziletin túzetýlerdiń taǵy bir blogy ýákiletti organǵa aqparat beretin ÚEU tizimin ońtaılandyrýǵa baǵyttalady. Qazirgi ýaqytta «Komersıalyq emes uıymdar týraly» Zańǵa sáıkes mekeme, qoǵamdyq birlestik, aksıonerlik qoǵam, qor, zańdy tulǵalar birlestigi túrinde (saıası partıalar, kásipodaqtar men dinı birlestikterdi qospaǵanda) barlyq komersıalyq emes uıymdar jyl saıyn QR Din isteri jáne azamattyq qoǵam mınıstrligine esep berýge mindetti.
Berilgen normanyń quqyq qoldaný tájirıbesi ony jetildirý qajettigin kórsetti. Óıtkeni, bul tizimge kiretin barlyq komersıalyq emes uıymdar úkimettik emes uıymdar bolyp tabylmaıdy. Sondyqtan, usynylyp otyrǵan ózgertýlerge sáıkes ÚEU derek qoryna málimetter berýdi qajet etetin uıymdar tizimi naqtylanady.
Jalpy, mınıstrdiń aıtýynsha joǵaryda atalǵan ózgerister halyqaralyq tájirebıeni, onyń ishinde Ulybrıtanıa, Kanada, AQSH, Polsha, Fransıa jáne Horvatıa sıaqty memleketterdiń tájirebıesin eskere otyryp ázirlengen.
«Usynylyp otyrǵan sharalar áleýmettik máselelerdi sheshýge turǵyndardyń qatysý deńgeıin jáne azamattardyń memlekettik saıasatqa degen senimin arttyrýǵa múmkindik beredi», - dedi mınıstr D. Káletaev.
Anyqtama: Zań jobasy aıasynda Ákimshilik quqyq buzýshylyq týraly kodekske jáne 6 salalyq zańdarǵa ózgerister engiziledi. Zań jobasynyń negizgi erejeleri memlekettik áleýmettik tapsyrysty júzege asyrýdy jetildirýge baǵyttalǵan.
