Qytaı azamattaryna Qazaqstanǵa vızasyz kirýge ruqsat berilgenine halyq narazylyq bildirip, jelide qyzý talqylap jatyr. QHR  azamattaryna vızasyz rejım qaı ýaqytqa deıin jaramdy jáne olar qandaı shartpen vızasyz kire alady? Vızasyz rejım engizýdiń astarynda ne bar? Qamshy.kz aqparat agenttigi osy suraqtardyń jaýabyn izdep kórdi.

QR Úkimetiniń №814 qaýlysymen Astana, Almaty arqyly QHR azamattaryna arnalǵan 72 saǵattyq tranzıttik vızasyz rejım engizildi. Bul rejım 2018 jyldyń 31 jeltoqsanyna deıin jaramdy. Qaýlyǵa QR premer-mınıstri Baqytjan Saǵyntaev qol qoıǵan.

Tranzıttik vıza tek Qazaqstannan basqa elge bıleti bar azamattarǵa beriledi, ıaǵnı elge kelgen azamattyń Qazaqstannan ary qaraı basqa qalaǵa (memleketke) ushatyn bıleti bolýy qajet. Osy jaǵdaıda ǵana olar Qazaqstanǵa vızasyz kirgiziledi. Áıtpese tranzıttik vıza berilmeıdi.

72 saǵattyq tranzıttik vızasyz rejım byltyr EKSPO qarsańynda engizilgen. QR Mádenıet jáne sport mınıstri Arystanbek Muhamedıuly vızasyz rejım Qazaqstannyń týrısik salasynyń damýyna jáne Qytaımen aradaǵy strategıalyq qarym-qatynasty nyǵaıtýǵa yqpal etetinin aıtady.

«EKSPO aldynda pılottyq rejımde engizilgen tranzıttik vızasyz rejım qaýipsiz ekenin kórsetti. Úsh aıdyń ishinde Qytaıdan elge kelgen 4 500 týrısiń árqaısysy el ekonomıkasyna 250-300 AQSH dollaryn qaldyrdy», — degen bolatyn Arystanbek Muxamedıuly.

QR UQK Shekara qyzmeti Qazaqstannyń shekarasyndaǵy ótkizý pýnkterinde 72 saǵattyq vızasyz rejımdi qoldanatyn sheteldikterdi tirkeıdi. Olarǵa mıgrasıalyq kartochkalar beriledi. Onda Qazaqstannyń shekarasynan ótken ýaqyty kórsetiledi.

Vızasyz rejımdi qoldanatyn sheteldikter Astana men Almaty halyqaralyq áýejaıyna kelmes buryn Qazaqstanyń áýe kompanıalary olardyń tizimin UQQ Shekara qyzmetine jáne İshki ister mınıstrligine beredi.

Eger Qytaı azamattary vızasyz rejımdi buzsa, olardy óz aqshalaryna Qazaqstannan shyǵarady. Al qarjysy bolmaǵan jaǵdaıda barlyq shyǵyndy sheteldikti elge alyp kelgen áýe kompanıasy kóteredi.