Batys Qazaqstan Oblysy ákimi Altaı Kólginov Shyńǵyrlaý jáne Bórili aýdanyna jumys saparymen bardy, dep habarlaıdy Qamshy.kz aqparat agenttigi. Ákim buǵan deıin oblystaǵy birneshe aýdanǵa jumys saparymen baryp, turǵyndardyń turmys-tirshiligimen jáne aýdandardyń ekonomıkalyq jaǵdaıymen tanysqan bolatyn.
Shyńǵyrlaý aýdanyna jumys sapary aıasynda oblys ákimi Ashysaı aýylynda «Aqbulaq» baǵdarlamasy boıynsha júrgizilip jatyrǵan sý qubyrynyń qurylysymen tanysty. Bólingen qarjy – 269 mln. 759 myń teńge. Qurylys nysany aıaqtalǵan soń aýyldyń 500-ge jýyq úı taza aýyz sýmen qamtylatyn bolady.
Qurylys nysanda eńbek ardagerler men turǵyndardyń qatysýymen aýdan ákimi Albert Esalıevtiń Shyńǵyrlaýdaǵy áleýmettik-ekonomıkalyq damýy jóninde esebi tyńdaldy. Onyń málimdeýinshe, aýdannyń tórt eldi mekeninde sý qubyrynyń jumystary júrgizilýde, aǵymdaǵy jyldyń qorytyndysy boıynsha aýdannyń 86%-ti taza aýyz sýmen qamtylatyn bolady. Sonymen qatar, aýdanda jol, áleýmettik nysandardyń qurylysy jaıly málimet berildi.
Sondaı-aq, oblys ákimi memleketik qoldaýynyń arqasynda jumys istep jatqan «Ǵaını» sharýa qojalyǵynyń qus sharýashylyǵyn aralap, aýyl sharýashylyq salasyndaǵy mamandarmen kezdesti. «Ǵaını» sh/q basshysy Jasqaırat Aısıev bolashaqta qus sanyn 8 myńǵa jetkizýdi josparlap otyrǵanyn jetkizdi. Oǵan qosa, qojalyqta zamanaýı qondyrǵy ornatylǵan (jel jáne kún sáýlesinen energıa kózderin alatyn gıbrıdtik qondyrǵy) aıtty. Kezdesýde sharýa qojalyqtarynyń basshylary ónimdi ishki naryqpen qatar syrtqa shyǵarýdy kózdeıtinin jetkizdi.
Oblys ákimi sonymen qatar Shyńǵyrlaý aýylynyń shyǵys bóliginde «Nurly jer» baǵdarlamasy boıynsha salynyp, paıdalanýǵa berilgen 30 turǵyn úıge qonystanǵan turǵyndarymen kezdesip, «Patrıot» sýpermarketiniń jumysyn baǵalap, aýylishilik abattandyrý jumystarymen tanysty.
Aýdandyq demalys saıabaq aýmaǵynda ornalasqan orman qorynyń jerlerin eldi-meken jerlerine aýystyrý jumysymen tanysyp, saıabaqta aýyl jastarymen júzdesti. Budan bólek, oblys ákimi aýdandyq tarıhı-ólketaný mýzeıin aralady. Sapar sońynda memlekettik baǵdarlamalardy nátıjeli júzege asyrý jáne aýdannyń áleýmettik-ekonomıkalyq damý máseleleri boıynsha birqatar naqty tapsyrmalar berildi.
Bórli aýdanyna barǵan Kólginov Aqsaı qalasy, Pýgachev jáne Bórli aýyldyq okrýgterindegi óndiris oryndary men sharýa qojalyqtaryn, birqatar qurylys nysandaryn aralady.
Aldymen aýdan ortalyǵynda ornalasqan «RT Alliance» JSHS-na baryp, suıyq azot óndirý zaýytynyń qurylysymen tanysty. Quny 1 mln. AQSH dollaryn quraıtyn zaýyttyń qýattylyǵy jylyna 500 kg/saǵ. Qazirgi tańda zaýyttyń qurylysy tolyq aıaqtalyp, ınjenerlik jeliler tartylýda. Taıaý kúnderi iske qosylatyn óndiris oshaǵy elimizdegi «KPO b.v.» sıaqty ken óndirýshi kompanıalardy taza azotpen qamtymaq.
Aqsaı qalasyndaǵy tórtinshi jáne besinshi shaǵyn aýdandardyń jylý jáne ystyq-salqyn sý júıesin qaıta qurylymdaý jumystarymen de tanysty. Joba quny - 576, 0 mln. teńge. Jalpy uzyndyǵy 32 418 metrdi quraıtyn sý júıeleriniń qurylysy bıylǵy qyrkúıek aıynda aıaqtalmaq.
Aqsaıdaǵy sheshimin kútken ózekti máseleniń biri – joldyń jaıy ekeni belgili. Kezdesý barysynda oblys ákimi Altaı Kólginov jaqynda oblysqa jumys saparymen kelgen Elbasy N. Nazarbaevtyń Aqsaı baǵytyna qatynaıtyn jol qurylysyn salýǵa úlken qoldaý kórsetkeni týraly qýanyshty habardy jetkizip, qazir QR Investısıalar jáne damý mınıstrligimen jobalyq smetalyq qujattar daıyndalyp jatqanyn, keler jyly Aqsaı arqyly Oraldan Orynborǵa deıin tórt jolaqty avtojol salynatynyn aıtty.
Jumys sapary aıasynda oblystyq mańyzy bar 90 shaqyrymdyq Aqsaı-Jympıty tas jolyn jóndeý jumystaryn tekserdi. Merdiger «Iýnıserf» JSHS, jobanyń birinshi kezeńinde 38-53 shaqyrymda (15 shaqyrym) jol jóndeý jumystaryn «AqsaıBıznesStroı» JSHS iske asyrýda, jobanyń somasy 1 958,014 mln teńge. Ekinshi kezeńde 53-68 shaqyrym (15 shaqyrym) jóndeý jumystarymen «Asfa» JSHS aınalysýda. Bul jobanyń jalpy somasy 1 943,729 mln teńge.
Jóndeý jumystarynyń barysyn pysyqtap, qosalqy merdigerlermen tildesken oblys ákimi jumystyń sapaly ári ýaqtyly júrgizilýin tapsyrdy. Qurylys materıaly men jumys kúshiniń jáne tehnıkanyń jetkilikti ekendigin aıtqan qosalqy merdigerlerler ózderine tıesili ýchaskeni tamyz aıynyń sońyna deıin aıaqtaýǵa ýáde berdi.
Sondaı-aq, Aqsaı shaharyndaǵy kezekti qurylys Aqsaı tehnıkalyq koleji jataqhanasynda júrgizilýde. Apatty jaǵdaıda turǵan burynǵy eski jataqhana ornyna bes qabatty 124 páterlik jańa turǵyn úı boı kóterýde. Joba quny – 635 423,0 myń teńge. Búgingi tańda ishki árleý jumystary qalǵan jataqhana shilde aıynda paıdalanýǵa berilip, burynǵy apatty úıdiń 70 otbasyna qosa búdjettik sala mamandary da baspanaly bolmaq.
Oblys ákimi Altaı Kólginovke tanystyrylǵan taǵy bir qurylys nysany aýdandyq ishki ister bóliminiń «Shuǵyl basqarý ortalyǵy» boldy. «KPO b.v.» kompanıasynyń áleýmettik tapsyrysy aıasyndaǵy jobanyń jalpy quny 132 371,0 myń teńge.
Úsh qabatty ǵımarattyń tómengi qabatynda quqyq qorǵaý qyzmetkerlerine arnalǵan jumys bólmeleri, jattyǵý zaldary men tır alańdary oryn tepse, ekinshi qabaty tolyǵymen shuǵyl basqarý ortalyǵyna arnalyp, jabdyqtalǵan. Ǵımarattyń joǵary qabatynda quqyq qorǵaý qyzmetkerlerine arnalǵan qyzmettik páterler ornalasqan. Sonymen qatar, jaqyn arada Aqsaı qalasynyń kóshelerine «Qaýipsiz qala» baǵdarlamasy aıasynda 100-den astam beınekamera qoıylyp, shahardyń qaýipsizdigi osy atalǵan shuǵyl basqarý ortalyǵy arqyly basqarylyp otyrady.
Sapar barysynda oblys ákimi Aqsaıdaǵy 240 oryndyq balabaqsha jáne Bórli aýylynyń dene shynyqtyrý-saýyqtyrý kesheniniń qurylystaryn tekserdi. Atalmysh nysandar aǵymdaǵy jyldyń tamyz aıynda paıdalanýǵa beriledi.
Sondaı-aq, Pýgachev aýylynda ornalasqan «Amanat» sharýa qojalyǵynyń sút fermasynyń qurylysymen tanysty. 600 bas iri qara malǵa arnalǵan fermanyń qurylysy jyldyń sońyna deıin aıaqtalady. Investısıalyq jobanyń quny – 2,5 mlrd. teńge.
Jumys saparynyń sońynda oblys ákimi aýdan áleýetin tolyq paıdalaný týraly tıisti tapsyrmalar berdi.
