Oral qalasy  boıynsha  turmystyq  qatty qaldyqtardy jınaýǵa, shyǵarýǵa jáne kómýge arnalǵan tarıfti bekitilmek. Bul týraly Oral qalalyq turǵyn úı komýnaldyq-sharýashylyǵy jáne turǵyn úı ınspeksıasy bóliminiń basshysy Mırjan Nurtazıev bylaı degen bolatyn.

– Kúni búginge deıin turmystyq qatty qaldyqtar tarıfi ár adamǵa 115 teńgeni qurady. Jańa ádis boıynsha esepteý júrgizgenimizde kisi basyna bul baǵa – 380 teńgeni qurady. Biraq áleýmettik jaǵdaıdy eskerip, tarıfti tómendettik. Qazir kópqabatty úı turǵyndary úshin jańa tarıf adam basyna – 215teńgeni, al jeke turǵyn úıler úshin – 219 teńgeni qurap otyr. Turmystyq qaldyqtard y  jınaý, shyǵarýǵa arnalǵan tarıf quny bir tekshe metrge 705 teńgeni quraıdy. TQQ kómý – 1 tekshemetri 160 teńge,– deıdi atalmysh bólim basshysy.

Oral taza qala sanalǵanymen, kópten beri polıgon máselesi sheshilmeı kele jatqan bolatyn. Qazir bul másele de qolǵa alynǵan. Turmystyq qatty qaldyqtar tarıfi qalada 2008 jyldan beri ózgermegen. Endi baǵany kóterýge týra kelgen.

– «Oral Taza Servıs» JSHS shyǵyny kóp kásiporyn. Jumysshylardyń jalaqysy bes jylda 30 paıyzǵa ǵana kóterildi, bul aralyqta naryqtaǵy baǵa 3-4 ese ósti. Qazaqstannyń ózge qalalarynda qoqys shyǵarý baǵasy bir adamǵa 175-500 teńge aralyǵynda. Biz respýblıkalyq deńgeıden tómen tarıf bekittik, – deıdi Oral qalasynyń  ákimi Murat Rahmetuly.

Oral  qalalyq ekonomıka jáne búdjettik josparlaý bóliminiń basshysy  Almıra Tólegenovanyń aıtýynsha, bıyl shahar búdjeti 1100000 myń teńgege kóbeıgen. Atalmysh qarajattyń negizgi bóligi qalanyń alty kóshesin kúrdeli  jóndeýge  baǵyttalyp otyr.  Sondaı-aq  jol qozǵalysy qaýipsizdigin  qamtamasyz  etýde údemeli tehnologıany qoldanýǵa – 200 059 myń teńge, qala kóshelerin jaryqtandyrýdy jańǵyrtýǵa – 173 166 myń teńge, qala sanıtarıasyn qamtamasyz etýge – 269 282 myń teńge, «Turǵyn úı komýnaldyq sharýashylyǵyn  jańǵyrtý » baǵdarlamasy sheńberinde turǵyn úılerdi jóndeýge – 62 672 myń teńge, «Sıfrly Qazaqstan» baǵdarlamasy boıynsha sıfrlyq saýattylyqqa oqytýǵa – 13 829 myń, ınjenerlik jelilerge quqyq belgileıtin qujattardy daıyndaýǵa – 12 500 myń, qalanyń úsh aýdany boıynsha TJJ ázirleýdi aıaqtaýǵa – 73 034, jobalyq-smetalyq qujattamalar saraptamasyna – 10 304 myń teńge baǵyttalǵan. Belgilengen  ózgertýler esebimen qalalyq búdjet 41 466 267 myń teńgeni quraıdy.