Almaty qalasy S.Begalın atyndaǵy memlekettik balalar kitaphanasynda Astananyń 20 jyldyǵyna oraı aqyn, dramatýrg, memleket jáne qoǵam qaıratkeri Nurlan Orazalınmen kezdesý ótti. Kezdesýdi Almaty qalasy İshki saıasat basqarmasynyń tapsyrysymen «El-shejire» qoǵamdyq qory uıymdastyrdy.
Jıynnyń basty maqsaty – Elordanyń elimizdiń damýyna qosqan úlesi men atqarylǵan uly isterin jastarǵa jetkizý. Sondaı-aq, jas qalanyń ulttyq sıpatymyzǵa aınalyp, beriktigimizdi saqtaı alǵanyn tolyǵyraq túsindirý.
Álemdegi eń jas astanaǵa – 20 jyl. Osy ýaqyt aralyǵynda jańa qala jasampaz Elordaǵa aınaldy. Arqa tósinde sáni men saltanaty jarasyp, ozyq ıdeıalardy, jańa ǵylymı sheshimder men sáýlet óneriniń ozyq úlgilerin ómirge ákeldi. Tolǵaqty túıinderdi talqylaıtyn jahandyq ortalyq boldy. Osy oraıda Nurlan Orazalın áńgimesin arydan bastap, Alataýdan Arqaǵa qalaı kóshirilgeni jaıynda baıandady. Buǵan qosa, Astananyń búginge deıingi dańǵyl ári dara jolyn tushymdy oılarymen ortaǵa saldy.
«Astanany kóshirý aıtar aýyzǵa ońaı bolǵanymen, ol zamanda kóp qıyndyq týdyrdy. Bir úreı, bir qorqynyshpen úlken jaýapkershiliktiń júgi artyldy. 1993 jyly «Egemen Qazaqstan» gazetine bas redaktor qyzmetine ornalastym. Elbasymen bolǵan alǵashqy suhbatymda osyǵan qatysty suraq qoıǵanmyn. Sonda ol kisi «Biz memlekettik tutastyǵymyzdy saqtaý úshin, Almaty sekildi ardaqty, aıaýly qalanyń mártebesin bekite otyryp, astanany soltústikke kóshirýge tıispiz. Óıtkeni táýelsizdigimizdi alǵanymyzben, áli tektiligimiz boıymyzǵa tolyq sińe qoıǵan joq, sondyqtan arqaǵa kóshti túzeýimiz kerek», – dep jaýap bergen bolatyn. Dese de bul sheshimge qarsylyq tanytqandar da boldy. Biraq ishki mıgrasıany, saıası sıpaty bar Astanany qalyptastyrýdy barlyǵy qalady. Egemendi el ataný – qazaqtyń mańdaıyna bitken baǵy. Tutastyǵymyzdy saqtap kele jatqan birtutas ultpyz. Osy jyldar ishinde táýelsizdiktiń tizginin ustaı alatyn qabiletimizdiń bar ekenin dáleldedik», – dedi N.Orazalın.
Kezdesýge jınalǵan qonaqtar aqynǵa arnaıy suraqtaryn qoıyp, óleńderinen oqyp berýin ótindi. Osylaısha Astananyń torqaly toıyna arnalǵan kezdesýde kezekti óleńderin oqyp, keshti qorytyndylady.
