Almatyda saıası qýǵyn súrgin qurbandaryna arnalǵan burynǵy murajaı qonaq úıge aınalmaq. Kezinde NKVD keńsesi bolǵan ǵımarattyń qazirgi qojaıyny nysandy buzyp, joǵarǵy qabatynan jatyn bólme, al Alash arystary tergelgen jerden meıramhana ashýǵa kirisip te ketipti. Almatynyń bir top belsendileri ǵımarat qojaıynynyń bul sheshimine túbegeıli qarsy bolyp, televıdenıege deıin shyqqan. Alaıda olardyń janaıqaıyn elep jatqan eshkim joq. Kerisinshe, burynǵy ishki ister halyq komısarıatynyń ǵımaratyn qyp-qyzyl aqshaǵa satyp aldym degen kásipker ony óz qalaýynsha ózgertýge haqyly ekenin aıtyp otyr. Bul týraly KTK arnasy kórsetti.

Kezinde qazaqtyń muńyn muńdap, joǵyn joqtaǵan talaı azamattyń máıiti shyqqan, burynǵylar tabaldyryǵynan attamaq túgili, terezesine qaraýdan qorqatyn mekeme oıyn-saýyq ordasyna aınalǵaly tur.

Qazaqstandaǵy saıası qýǵyn-súrgin qurbandary qaýymdastyǵynyń tóraǵasy Jumabek Ashýuly nyń ǵımarat basshylyǵyna ókpesi qara qazandaı.

«İshin tas-talqan etip buzap tastaǵan, bul jerden qonaq úı salamyz deıdi. Búkil qandy qyrǵynnyń orny bolǵan jerge adamdar qalaı kelip turady? Qalaı dátteri bar osyndaı jerge qonaq úı salady? Qanshama qazaqtyń betke ustar azamattary bir kún emes, aılap azaptalyp atylǵan jer. Bul jerge solardyń muń-azyr sińip, qandary tamǵan jer. Budan artyq qandaı tarıhı oryn bolý kerek?» - dep ashyndy Ashýuly.

Bul ǵımaratta sonaý 86-daǵy Jeltoqsan oqıǵasyna qatysýshylar da tergelgen. «Jeltoqsan qoǵamy» qoǵamdyq birlestiginiń tóraǵasy Nurlybek Qýanbaev jeltoqsandyqtardyń sýrettteri men kitaptary dálizde shashylyp, qoqys bolyp jatqanyna qapaly.

«Men ózimniń sýretimdi, basqa da tanıtyn jigitterdiń sýretin korıdordan jınap terip aldym sol jerden. Bul árýaqty jer. Molany súrip tastap, ústine úı de salmaıdy ǵoı restoran túgili. Qanshama adamnyń qany bul jerde, kóz jasy bar. Ǵımarattan ólikter shyqty ǵoı bylaısha aıtqanda», - dedi ol.

Belsendiler qansha ýlap-shýlaǵanymen ǵımarattyń qasıetin túsinetin bir kásipker tabylmapty. Tipti qundylyǵyn áldeqashan joǵaltqan mekemege teńeıtin kórinedi.

«Ústinde bir on bes mınýtta taǵdyryn sheshedi adamnyń, tómenge túsiredi de atyp tastaıdy. Osynda astynda podvalynda «tır» dep ataıtyn ózderi. Ttı degen jer bar osy kúnge deıin aýzyn jaýyp qoıǵan. Atady, sodan keıin qapqa salady da qalanyń syrtyna aparyp tastaı bergen. Bul qazaqtyń qasiretti tarıhyna, qasiretti belesterine tikeleı qatysty ǵımarat. Sondyqtan da ol tarıhı ǵımarat», - dedi tarıhshy Beıbit Qoıshybaev.