Qazaqstan prezıdenti Nursultan Nazarbaev dombyra men qazaq ánderi týraly aıtty. Bul týraly Aqordanyń Facebook-tegi paraqshasynda jarıalandy.

«Dombyra qazaqtyń jan dúnıesimen baılanysty. Kúıdi, dombyranyń áýenin, sazyn murnyna jýsan ıisi barǵan ári Uly dala tósinde ómirge kelgen qazaq qana túsine alady. Sebebi bul erekshe mýzyka adamnyń jan dúnıesin kórsetedi, ıaǵnı muńdy nemese qýanyshty, oıdy ashyq baıqatady. Keshkilik dombyrany shertip otyrǵan kezde, barlyǵy umytylady. Maǵan bul áser unaıdy, sondaı-aq dombyrada jaqsy oınaıtyn adamdarǵa qurmetpen qaraımyn. Bizdiń qazaq halyq ánderi men jyrlary adamnyń jan-sezimin tolqytady, olarda fılosofıalyq mazmun bar. Qazaq ánderi men jyrlarynda mýzykaǵa emes, ondaǵy sózderge mán berý kerek. Bul sózderdiń máni óte tereńde jatyr jáne olardyń úlken mańyzy bar», - dedi Memleket basshysy.

Aıta keteıik, Memleket basshysy Nursultan Nazarbaevtyń Jarlyǵymen  shildeniń birinshi jeksenbisi  Ulttyq dombyra kúni bolyp belgilengen bolatyn.