Qatigez ata-ana tilazar ulyn temirjol boıyna tastap ketken. Dál sol mezette júıtkigen poıyz da jetip, jetkinshektiń ómirine qaýip tónipti. Balanyń perishtesi qaqqan bolýy kerek, adam kóp júre bermeıtin jerden aıaq asty tabyla ketken qyzdar ony bir ajaldan aman alyp qaldy. Boıjetkender oqıǵany beınekameraǵa túsirip, týǵan balasyna salǵyrttyq tanytqan ata-anany áreketin synǵa alǵan. Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.
Shoıyn joldyń ústinde otyrǵan balany baıqaǵan qyzdar birden janyna barǵan. Jetkinshek óksigin tyıa almaı otyrypty. Tastap ketken ata-anasyna qatty renjip qalsa kerek. Biraz ýaqyttan soń júıtkigen poıyzdyń kele jatqanyn baıqaǵan boıjetkender, relsten ony áketpek bolady. Biraq, áke-sheshesine degen ókpesi basylmaǵan ol temirge kenedeı jarmasyp, otyryp alǵan.
Osylaısha, qyzdardyń tabandylyǵynyń arqasynda áýpirimdep júrip qutqaryldy balaqaı. Kóp uzamaı, oqıǵa ornyna anasy da jetken. Shoshyǵannan ba álde basqa sebepten be, ún qatqanyn estimedik. Esesine qutqaryp qalǵan qyzdar bar qaýipti endi sezindi me, áıteýir jylap jibergen.
«Vy ne dýmaıte, chto ıa na vas krıchý ılı povyshaıý ton. Mená prosto vsú tráset. Vy ponımaete, chto my tolko chto spaslı vashego rebenka! Ia seıchas býdý plakat».
Keıin oqıǵanyń Temirtaýda bolǵany anyqtaldy. Eki balasyn jetektegen ana jergilikti jaǵajaıǵa demalýǵa kelgen eken.
«Balanyń qatty jylap, qyrsyǵyp jatqanyn kórdim. Anasy ony demalys ornyna kirgizýdi surady. Biraq, ol kónbedi. Jolda otyryp qaldy. Anasy mas bolǵan joq. Olar biraz demalyp keıin birge qaıtqanyn kórdim» - deıdi kýáger Sergeı Kýznesov.
Biz beınejazbadaǵy anany da taptyq. Joldasymen ajyrasqan, eki balasyn ózi jalǵyz asyrap júr. Sol kúni ádettegideı, balalarmen birge demalysqa barmaq bolǵan. Biraq kenjesi áldenege renjip qalsa kerek. Qyrsyqqan. Úlkenderiniń kıim-keshegin jaǵajaıǵa kirgizýge ketkende bolǵan oqıǵa dep túsindirdi. Oqıǵaǵa qatysty rezonans týǵanynan shoshyp qalǵan ana, ózin jamandaǵandarmen kelispeıtinin bildirdi. Jaıttan soń júregi aýyryp, ýys-ýys dári ishýmen júrmin deıdi.
«Árıne, meniń kinám bar. Balammen birge qalyp sóılesý kerek edi. Biraq, úlkenim oǵan kónedi. Al, kenjemniń minezi aýyr. Ózdiginen sabasyna túspese, eshnárse áser ete almaıtynyn bilemin. Beıneni salǵandar ózderine jarnama jasaǵysy kelgen shyǵar. Onda jazǵan pikirlermen kelispeımin. Balamdy uryp kórmegenmin» - deıdi balanyń anasy Irına Kýlıchkova.
Oqıǵa jergilikti bilim bóliminiń nazaryna da ilikti. 9 jastaǵy Sashaǵa qatysty buǵan deıin eshqandaı eskertýler bolmapty. Anasyna da shaǵymdanǵan kez tirkelmepti. Degenmen, beınejazbadan soń, alty aılyq baqylaý taǵaıyndalǵan.
«Anasynyń balalardy osyndaı jaǵdaıda qaldyrýyna baılanysty anasyn esepke alyp, esepte ustaımyz dep oılaımyn. Tek qana Temirtaý qalalyq bilim bólimi emes, mekteptiń sos pedagogy bar, synyp jetekshisi qadaǵalap, endi bolashaqta qadaǵalap ustaıtyn bolamyz» - deıdi Temirtaý qalasy bilim bólimi basshysynyń mindetin atqarýshy Halıpa Jaýdınova.
Balasynan aıyrylyp qala jazdaǵan ana beınejazbany jarıalaǵandarǵa ókpeli ekenin jasyrmady. Biraq, perzentin qutqaryp qalǵandarǵa rıza ekenin bildirdi.
Gúlnur Jaqsylyqova
