«Áı deıtin ája, qoı deıtin qoja» bolmaǵan soń, asabalar toıdy qyzdyramyn dep oıyna kelgenin istep, ábden esirip barady. Ene men kelin arasyndaǵy bıazy syılastyqty saıqymazaqqa aınaldyrǵan myna asabaǵa ne dersiń?
Dúıim eldiń aldynda masań jigitke asylyp bıleıtin bıshilerdi esirtip júrgen de, jumsaq oıynshyqqa otyryp alyp, eteginiń qaıda qalǵanyn bilmeı, kúlli qaıynaǵalarynyń aldynda áýretti jeri jylt etse de, aqylynan adasyp, jeligin basa almaǵan qatyndarǵa esirik oıyndy oınatyp júrgen de osy asabalar. Bir qyzyǵy, toıdaǵy dúıim eldiń birde-biri: ne toı ıesi, ne qart-qarıa, ne ózin zıalymyn dep esepteıtin el aǵalary áperbaqan asabaǵa «áı, munyń ne?» dep basý aıtpaıtyny tań qaldyrady. Kerisinshe, uıatty áreketterine máz bolyp, qol shapalaqtap, qosyla qoldaý bildiretini oılantady. Masań adamnyń álsiz sátin ájýaǵa aınaldyra qoıar mundaı asabalarǵa basý aıtar, ádep etıkasyn eske salar jergilikti jerdegi arnaıy qaýly-qarar kerek sıaqty. 
Toı ústinde tárbıege jat oıyn oınatyp, erkinsigen asabaǵa aıyppul salynyp, aıyppuldan túsken qarjyǵa sol toıhanaǵa kelgen meımandarǵa etıkalyq oı salar qanatty sózderdi kire beriske banner túrinde jazyp, ilip qoıý kerek. Ádepsiz asababalardy «qara tizimge» tizbelep, toı uıymdastyratyn prodúser ortalyqtaryna berip qoıǵan da artyqtyq etpeıdi. Álgi asaba ospadarsyz qylyǵyn ekinshi ret qaıtalasa, aıyppul kólemin ulǵaıta berý kerek. Sonda ǵana toıdan aıyrylǵysy kelmegen asaba lajsyzdan kitaphanaǵa baryp izdenip, kópti kórgen aqylman qarıalardan aqyl-keńes suraı bastaıtyn bolady.

Bekjigit Serdalynyń feısbýk paraqshasynan