Almatyda Mural Fest festıvali bastalǵannan beri 3 jyl ishinde 23 úıdiń qabyrǵasyna sýret salynǵan.

Mural Fest festıvali Almatyda 3-shi ret qatarynan ótkizilýde. Joba aıasynda qazaqstandyq jáne sheteldik sýretshiler qaladaǵy  úılerdiń  qabyrǵasyna sýret salady.

Búginde megapolıste 23 kópqabatty turǵyn úı syrty sýretpen árlengen.  Qalada mundaı ónermen birneshe sýretshiler toby aınalysady.

Máselen, ýkraındyq Doksanyń qazaqstandyq Saıd Atabekovtyń fotokollajy jelisimen jasalǵan jumysy bar. Shetelde eńbekteri tanymal Repas komandasy  shymkenttik sýretshi Rasýl Esmesovtyń shyǵarmasyn qabyrǵaǵa túsirgen. Festıvál kýratory Móldir Bekjannyń aıtýynsha, «Balalar álemdi beıneleıdi» qoǵamdyq qorynyń usynýmen 11 jasar pavlodarlyq búldirshinniń sýreti  Almaty úıleriniń biriniń qabyrǵasyna tańdalyp alynǵan.

«Bul týraly jelge ushqan shyǵyn dep aıtyp jatyr. Alaıda buǵan sonshalyqty  qarajat  kerek emes. Sheteldik sýretshiler bul festıváldi estigende tańǵalǵandaryn jasarmaıdy. Sebebi Ortalyq Azıa boıynsha  mundaı monýmentaldi óner festıvalin Qazaqstanda ǵana uıymdastyrylyp otyr. Ózimizdiń  qazaqstandyq sheberler jyl saıyn qatysady. Jumystyń kóp bóligi solardyń eńbegi. Halyqaralyq festıvál bolǵandyqtan  sheteldik sýretshilerdi de shaqyramyz. Olardyń kelýi Qazaqstanǵa, ásirese Almatyǵa  paıdasyn tıgizedi. «Búrkitshi» beınesin salǵan ýkraındyq sýretshi Andreı Palval óziniń 100 myńdaǵan oqyrmany bar áleýmettik paraqshasynda bizdiń mádenıetimiz týraly jazǵan. Almaty týraly, mundaǵy festıvál jaıly kóptegen sýretshi biledi, ózderi habarlasyp, qatysýǵa nıet bildirip jatady »,-dedi  Móldir Bekjan.

Kartınalar qabyrǵaǵa túspes buryn, eskız túrinde uıymdastyrýshylar tańdaýynan ótedi. Osydan keıin ǵana shyǵarmalardyń qala ómirine sáıkes keletini irikteledi.

Bıyl sýretshiler  birqatar úılerdiń syrtyn árlegen bolatyn.

Beıneleý óneriniń týyndylary  Baıtursynov-Gogol, Abaı-Áýezov kósheleri qıylysyndaǵy , sondaı-aq  Tóle bı boıyndaǵy  úılerdiń qabyrǵasynda paıda boldy. Konstıtýsıa kúni merekesi qarsańynda Nazarbev pen Qabanbaı batyr qıylysynda kartınalardyń sońǵy shtrıhtary salynyp bitti. Eskız avtorlary almatylyq Neon men Shaman esimdi jigitter.

«Ideıa ózimizdiki. Bizge shekteý qoıylǵan joq. Ótken jyly eskız jiberip bir jumysymyz tańdalǵan bolatyn, bıyl osyny laıyq dep tapty. Biz bul joly  bolashaqty beıneleýge tyrystyq. Adamzatty erte  me kesh pe tehnologıa zamany kútip tur. Bar tirlikti qultemirge artyp, adamdar uzaq ómir súre bastaıtyn kez alys emes»,-dedi sýretshiler.