Almaty kóshelerinde júrgizilip jatqan qarqyndy qurylys aıaqtalýǵa jaqyn. Qazirgi tańda tegistelmegen 17 kóshe ǵana qalyp otyr. Ol tamyz aıynyń aıaǵyna deıin tolyq jasalady. Jalpy, bıyl qalada 157 kóshede ortasha jóndeý jumystary josparlanǵan bolatyn. Odan bólek, tozǵan tramvaı relsteri alynyp, ornyna jaıly joldar tóselýde. Velojolaqtar salynyp, júrginshilerge qolaıly jaǵdaı jasalýda.
Bıyl Maqataev, Baıtursynov jáne Jarokov kóshelerindegi tramvaı relsteri alyndy. Uzyn-yrǵasy, 15 shaqyrymnan asatyn temir joldardyń orny tegistelip, asfált tóseldi. Shoıyn joldardyń jalpy uzyndyǵy 64 shaqyrym bolsa, olardy túgeldeı arshý jumystary 2019 jyly aıaqtalmaq. Al temirjoldar alynǵan kóshe boılaryna velojoldar syzyldy. Búginde velojolaqtyń jalpy uzyndyǵy 78 shaqyrymǵa jetken. Odan bólek, qazirgi tańda birneshe jolaıryq qurylysy júrip jatyr
«Almaty qalasy boıynsha úsh kólik jolaıyryǵy salynyp jatyr. Olar: Rysqulov dańǵyly men Emsov kóshesiniń qıylysyndaǵy, Jansúgirov kóshesi men Seıfýllın kóshesiniń qıylysyndaǵy jáne Rysqulov dańǵyly men Qulja kúre jolynyń qıylysyndaǵy jolaıryqtarynyń negizgi qurylymdary salynýda. Aıaqtalý merzimi – 2019 jyldyń jeltoqsan aıy», – dedi Almaty qalasy Jolaýshylar kóligi jáne avtomobıl joldary basqarmasy basshysynyń orynbasary Saǵyndyq Telibaev.
Bıyl qalada 155 shaqyrymdy quraıtyn 157 kóshege ortasha jóndeý jumystaryn júrgizý josparlanǵan. Onyń ishinde, 140 kóshede jumys tolyq aıaqtalǵan. Qazir tek 17-si qalyp otyr. Merdigerler oqý maýsymy bastalǵansha tas joldardy tegistep bitýi tıis. Alataý aýdanyndaǵy 5 shaǵyn aýdanynyń jobalaý smetalyq qujattary memlekettik saraptamadan ótip, qazir baıqaýǵa habarlama berilgen. Taǵy 12 shaǵynaýdannyń qujattary ázirlenip jatyr. Odan ózge, Naýryzbaı aýdanyndaǵy 41 kósheni jasaý josparlanǵan.
«Ortasha jol jóndeý jumystaryn júrgizip jatqan merdiger kompanıa 3 kepildik berýi tıis. Iaǵnı, eger jumys aıaqtalǵan soń osy ýaqyt aralyǵynda ol búlinse, ne kemshilikter anyqtalsa, ony óz qarjysyna qalpyna keltirýi kerek», – dedi Almaty qalasy Jolaýshylar kóligi jáne avtomobıl joldary basqarmasynyń bólim basshysy Nurzat Ordabaev.
Sonymen qatar, Nazarbaev dańǵylynyń boıy túgeldeı jańarady. Bas-aıaǵy 7 shaqyrym aýmaqty qamtıtyn dańǵyldyń qos betinde júrginshi jolyna tolyqtaı kespe tastar tóselinedi. 80 myń sharshy metrdi qamtıtyn aýmaqtyń 20 myńy kógaldandyrylmaq. Sondaı-aq, dańǵyl boıynda ornalasqan barlyq shamdar, sońǵy úlgidegi ásem túrlerine aýystyrylady. Sodan keıin júrginshiler jolynyń boıyna 200 oryndyq ornatylyp, ár qaısysynyń janyna qoqys jáshigi qoıylmaq. Oǵan qosa, 3 sýburqaq jasalady.
«Nazarbaev dańǵylyn úshke bóldik. Bir jartysy Qostanaıdan ákelingen kespe tastan, bir jartysy granıtten, bir jartysy Almatydan shyǵarylatyn kespe tastan bolmaq. Jaıaý júretin adamǵa óte ádemi. Eń basynan sońyna deıin gazon sebiledi. Kishkentaı aǵashtar, gúlder otyrǵyzylady. Buryndary qarapaıym kórinetin. Endi bári ásem bolady», – dedi qurylysshylar tobynyń jetekshisi Ádilhan Ábdiǵaparov.
Qazir Tımırázev kóshesinde de jumys qaýyrt. Munda BRT jelisi iske qosylmaq. Osy arqyly qoǵamdyq kólikter esh kedergisiz júıtkı alady. Jeli iske qosylǵannan bastap solǵa qaraı burylýǵa ruqsat etilmeıdi. Qoǵamdyq kólikter joldyń ortasymen, al jeke mashınalar kósheniń qaptalymen júretin bolady.
«Tımırázev kóshesinde jóndeý jumysy qyrkúıek aıynyń birinde aıaqtalady. Munda tek asfált tóselip qana qoımaı, barlyq komýnıkasıa aýystyrylyp jatyr. Odan bólek, troleıbýs jelisi de jasalýda», – dedi «Jol-qurylys kompanıasynyń» vıse-prezıdenti Aleksandr Shevelev.
BRT jelisiniń alǵashqy kezeńi 8 shaqyrymnan asyp jyǵylady. Bul joba Mustafın, Súleımenov, Jandosov, Tımırázev kósheleri boıymen Jeltoqsan kóshesine deıin salynady. Al BRT jelisiniń ekinshi kezeńi Jeltoqsan kóshesiniń boıymen Tóle bı kóshesine deıin, Tóle bı kóshesinen Shyǵys aınalma jolyna deıin júrgizilip, Shyǵys aınalma joly arqyly qala shekarasyna deıin uzartylmaq.
Pikir qaldyrý