Qazaqstan Coursera Global Skills Report 2026 jahandyq esebi aıasynda usynylǵan jańa AI-Human Skills Synergy Index 2026 ındeksinde 98 eldiń ishinde 55-orynǵa ıe boldy. Jańa ındeks bilim alýshylardyń jasandy ıntellekt salasyndaǵy daǵdylardy olardy tıimdi qoldanýǵa qajetti synı oılaý, kóshbasshylyq, komýnıkasıa jáne kúrdeli mindetterdi sheshý sıaqty negizgi adamı quzyrettermen qatar qanshalyqty belsendi damytyp jatqanyn baǵalaıdy.
Indeks onlaın oqytý paıdalanýshylary arasynda daǵdylardy damytý dınamıkasyn, sondaı-aq olardy el deńgeıinde qoldanýǵa qajetti jaǵdaılardy eskeredi. Coursera ádistemesine sáıkes qorytyndy baǵa daǵdylardy meńgerý deńgeıi, zerdelenetin quzyretterdiń aýqymy jáne AI daǵdylary men adamı daǵdylardyń úılesimi jónindegi kórsetkishterge, sondaı-aq Oxford Insights Government AI Readiness Index derekterine negizdeledi. Atalǵan ındeks memleketterdiń jasandy ıntellekt áleýetin paıdalaný múmkindigin memlekettik saıasat, ınfraqurylym, adamı kapıtal, AI sektorynyń damýy jáne basqa da faktorlardy eskere otyryp baǵalaıdy.
«Qazaqstan AI-Sana ulttyq baǵdarlamasyn iske qosqanda sıfrlyq kýrstarǵa qoljetimdilikti qamtamasyz etý jetkiliksiz ekenin túsindik. Júıeli ózgeristerge qol jetkizý úshin alynǵan bilimdi bilim berý prosesine engizip, ony is júzinde qoldanýǵa múmkindik beretin jaǵdaı jasaý mańyzdy boldy. Búginde baǵdarlamaǵa 100 joǵary oqý orny qatysyp, kýrstardy bilim berý prosesine engizý, nátıjelerdi baqylaý jáne jasandy ıntellekt tehnologıalarynyń qarqyndy damýyna sáıkes oqý mazmunyn turaqty túrde jańartý baǵytynda jumys júrgizip keledi. Sonymen qatar oqytýshylardyń sıfrlyq jáne pedagogıkalyq quzyretterin damytýǵa erekshe mán berip otyrmyz. Qazirdiń ózinde 1 200-den astam pedagog zamanaýı onlaın oqytý ádisterin meńgerip, sapaly 35 avtorlyq kýrs ázirleýge qatysty. Bul tásil jasandy ıntellekt salasyndaǵy bilimge qoljetimdilikti keńeıtip qana qoımaı stýdentterdi ózgermeli eńbek naryǵynyń talaptaryna júıeli túrde daıyndaýǵa múmkindik beredi», – dedi QR Ǵylym jáne joǵary bilim mınıstri Saıasat Nurbek.
Qazaqstannyń nátıjesi sıfrlyq oqytýdyń belsendi paıdalanýshylary arasynda jasandy ıntellekt salasyndaǵy tehnıkalyq quzyretterge ǵana emes, olardy is júzinde tıimdi qoldanýǵa qajetti daǵdylarǵa da turaqty qyzyǵýshylyq bar ekenin kórsetedi. Jasandy ıntellekt bilim berý úderisine, kásibı qyzmetke jáne kúndelikti jumys mindetterine keńinen enip jatqan qazirgi jaǵdaıda mundaı daǵdylardy qatar damytý aıryqsha mańyzǵa ıe.
Bul rette AI-Human Skills Synergy Index kórsetkishterin onyń ádistemelik erekshelikterin eskere otyryp qarastyrǵan jón. Coursera derekteri negizinen platforma paıdalanýshylarynyń bilim alýǵa qatysty belsendiligin kórsetedi jáne eldegi barlyq halyqtyń daǵdylar deńgeıin tikeleı sıpattamaıdy. Sondyqtan Qazaqstannyń nátıjesi sıfrlyq oqytýǵa qatysýshylar arasynda AI jáne adamı daǵdylardyń damý dınamıkasyn kórsetetin halyqaralyq kórsetkish ári quzyretterdi damytýdaǵy jahandyq úrdisterdi baǵalaýdyń qosymsha quraly.
