Kınematografshylarǵa qolǵabys etý maqsatynda Almaty ákimdigi janynan arnaıy organ qurylýy múmkin. Almaty Film Comission-nyń qyzmeti týraly alda ótetin halyqaralyq kınofestıvalǵa arnalǵan baspasóz máslıhatynda aıtyldy.

15-19 qyrkúıek aralyǵynda Almatyda alǵash ret Almaty Film Festival halyqaralyq sharasy ótedi. Forým aıasynda úzdik 30 fılm kórsetiletini josparlanǵan. Sondaı-aq qazaqstandyq rejıserlerge arnalǵan senarıler baıqaýy, belgili qonaqtardyń sheberlik sabaqtary, qazaqstandyq kınematografshylardyń sheteldik áriptestermen yntymaqtastyǵyn talqylaýǵa arnalǵan bıznes-forýmdar ótedi.

Almaty Film Festival sharasynyń bas prodúseri Ernar Qurmashevtiń aıtýynsha, qazir otandyq kınoındýstrıada serpilis baıqalýda jáne bul sátti ótkizip almaý mańyzdy.

«Dál qazir Almaty qalasynyń ákimdigimen birge kınofestıvaldi uıymdastyrýmen qosa, Almaty Film Comission-dy qurý boıynsha kelissózder júrgizýdemiz. Kınoprodússerler árdaıym ákimdikke kómek surap júginedi - túsirilimder úshin jedel járdem, órt sóndirý kólikteri qajet, keı jaǵdaılarda kıno túsirý úshin kóshelerdi jabýǵa týra keledi. Sondaı-aq belgili bir jerlerdi túsirý úshin ákimdikten ruqsat kerek. Qazir ákimdik bizge qoldaý kórsetip otyr. Almaty Film Comission - bul halyqaralyq tájirıbe. Ol barlyq kınematografshylarǵa, sonyń ishinde sheteldik áriptesterge resýrstarmen kómek kórsetetin ákimdik janyndaǵy organ bolady. Jalpy bul otandyq kınoındýstrıanyń ilgeri jyljýyna múmkindik beretin qural bolmaq», - dedi Almaty Film Festival bas prodúseri Ernar Qurmashev.