QR Ulttyq kitaphanasynyń zalynda túrik tilinde jazylǵan qazaq jazýshylary kitaptarynyń tusaýkeseri ótti. 

Berdibek Soqpaqbaevtyń «Meniń atym - Qoja», Taıyr Jomartbaıulynyń «Qyz kórelik», Spandıar Kóbeevtiń «Qalyń mal», Mirjaqyp Dýlatulynyń «Baqytsyz Jamal», Sultanmahmut Toraıǵyrovtyń «Qamar sulý» shyǵarmalary túrik tilinde jaryq kórdi. 

Baspadan bul kitaptardyń ázirge alǵashqy sıgnaldy nusqasy basylyp shyqqan. Qaıta qaralyp, túzetýler engizilgennen keıin qalyń oqyrmanǵa jol tartady. 

Joba demeýshisi - Túrkıa Respýblıkasynyń Ankara qalasyndaǵy Kechıoren aýdanynyń ákimi  Mustafa Aq. Ákim bastaǵan delegasıa men Túrkıanyń Almatydaǵy Bas konsýly Ryza Qaǵan Iylmaz sharanyń qurmetti qonaǵy boldy. 

«Búgin biz úshin mańyzdy kún. Ata qonysymyzda qandastarymyzben bas qosqanymyzǵa qýanyshtymyz. Uly mádenıetimizdiń ıisi túrki halyqtaryna ortaq ekeni málim. Osy sharaǵa qoldaý bildirgenimizdeı, aldaǵy ýaqytta da halyqaralyq máni bar jobalarǵa atsalysamyz. Sońǵy jyldary dostyq, baýyrlastyǵymyzdan bólek, tildik, mádenı qarym-qatynasymyz damyp keledi. Búgingi qazaq zıalylary eńbekteriniń túrik tiline tárjimalanýy, tıisinshe túrik avtorlary shyǵarmalarynyń qazaq tilinde jaryq kórip jatqany - osynyń dáleli»,-dedi Ankara qalasyndaǵy Kechıoren aýdanynyń ákimi Mustafa Aq. 

Aıta ketý kerek, Balalar ádebıeti baspasynyń bastamasymen Orhan Kemal, Mehmet Saraı, Mehmet Raýf, Aıkýt Ertýgrý, Sýngý Gúraı syndy túrik avtorlarynyń kitaptary qazaq tiline aýdarylǵan. Qazirgi tańda qoljazbalardy kitap qylyp shyǵarý úshin Almaty baspalarymen kelissóz júrip jatyr.