Aqtóbe oblysynyń ortalyǵynda «Anaǵa taǵzym» respýblıkalyq sleti ótti. Sharanyń «Ana álemdi terbetedi» atty seksıalyq jumysynda qoǵamdaǵy otbasylyq tárbıe, ónege týraly keń talqylanǵan bolatyn.
Sharanyń qurmetti qonaqtary jazýshy, ulttyq dástúrdi nasıhattaýshy Zeınep Ahmetova, QR balalar isteri jónindegi ýákili Sáýle Aıtpaeva, Qazaqstannyń halyq jazýshysy Á. Kekilbaevtyń zaıyby, dáriger Klara Jumabaeva jınalǵan jurtshylyqqa qoǵamdaǵy ana men balanyń róli jáne jastarǵa tárbıelik máni bar áńgimelerdi aıtyp berdi.
«Áıel bir qolymen besikti, ekinshi qolymen álemdi terbeıdi» deıdi dana halqymyz. Qazir elimizde ul-qyzyn tárbıelep, oǵan qosa qoǵam isine bilek sybana kirisip júrgen áıelder kóp. Derekterge súıensek, elimizde memlekettik qyzmettegi áıelderdiń úlesi 58 paıyz bolsa, solardyń ishinde joǵary laýazymdaǵy áıelderdiń úlesi — 10 paıyz. Al bizdiń oblysta bilim salasynyń 83 paıyzy — áıelder. Kezdesýde oblystyq bilim basqarmasynyń basshysy Lázzat Orazbaeva osy derekterge toqtalyp, sharanyń mánin túsindirip ótti. Kesh qonaǵy Sáýle Aıtpaeva qoǵamdaǵy ana men bala róline toqtaldy. Búgingi ótip jatqan analar sletiniń mańyzy zor ekenin aıtty. Al Zeınep Ahmetova ulttyq salt-dástúrge baılanystyryp jastarǵa aqyl-keńesin berdi.
— Elbasymyz rýhanı jańǵyrý týraly aıtty. Rýhanı jańǵyrý degenimiz — eki ánshini shaqyryp, án aıtqyzý emes, ol — sananyń jańǵyrýy. Qazir qazaqtyń san ǵasyr sarabynan ótip kelgen ónege, tárıbesiniń julym-julymyn shyǵardyq. Múlde basqa jaqqa qaraı burylyp ketti. Sondyqtan biz búginde talaı nársede tyǵyryqqa tirelip otyrmyz. Táýelsizdik aldyq, shekarany ashyp, qushaǵymyzdy jaıdyq. Jaqsy da, jaman da keldi. «Kórmegenge kóseý tań» degen, kórgenimizdiń bárin qabyldadyq. Bárin «mádenıet» dep uqtyq. Batys kelip jalańashtady, shyǵys kelip tumshalady. At tóbelindeı qazaqtyń shaqshadaı basy sharadaı boldy, — degen batyrdyń kelini jastardy ulttyq tálim-tárbıeden alystamaýǵa shaqyrdy. Sondaı-aq kezdesýde anany qurmetteý, úlkendi syılaý tóńireginde tárbıelik máni bar áńgimeler aıtyldy. Klara Jumabaeva enesimen qyryq jyl birge turǵanyn, úlkendi qalaı syılaý kerektigin aıtyp berdi.
— «Anaǵa taǵzym» atty sharany uıymdastyrýshylarǵa rızamyn. Bundaı shara jastarymyzdy anany qurmetteýge úndeıdi. Ómir anadan bastaý alady. Ana — meıirimniń bastaýy. Dúnıege bala ákeledi, ony azamat qylyp ósirip, tilegin tilep, barlyq aýyrtpalyqty arqalap júredi. Mysal retinde Ábishtiń anasy, enemdi aıtsam, ol kisiden kóp nárseni úırendim. Joldasy soǵysqa ketkende Ábish eki jastan asqan eken. Úsh qyzy men jalǵyz ulyn asyraý úshin barlyq qıyndyqty kórgen. Mańǵystaýdaǵy kómir shahtasynda jeti jyl jumys istegen. Ómir baqı jalǵyz ulynyń tilegin tiledi. Bar tabysymen jalǵyz balasyn oqytty. Uly eńbegin aqtady. Qyryq jyl balasy úshin beınet kórdi, qyryq jyl sonyń zeınetin kórdi. Enemi sabyrly, qonaqjaı
kisi edi. Toqsan segiz jasynda ómirden ótti. Qyryq jyl kelini retinde enemniń kóńilin tabýǵa tyrystym, — degen Klara Jumabaeva jas kelinderge keńesin aıtty.
Kezdesýdiń sońynda jastar, ustazdar suraq qoıdy. Ónerli baldyrǵandar án aıtyp, bı bılep qonaqtardy shyǵaryp saldy.
