Almatyda jantúrshigerlik jol apatyna kináliler áli ustatpaı júr. Týra bir aı buryn Altyn Orda bazarynyń mańynda jaıaý júrginshi jolaǵymen ótip bara jatqan kelinshekti júıitkigen kólik qaqqan.

Soraqysy sol, kináli azamat qansyraǵan áıeldi aýrýhanaǵa aparýdyń ornyna, kóligine salyp alyp qoqysqa tastap ketken. Ólim men ómirdiń arasynda jatqan Nurgúl Turǵynbaevany keıin polıseıler taýyp alypty. Jantúrshigerlik oqıǵa  týra osy jerde bolǵan. Joǵary jyldamdyqpen júıitkigen kólik, jaıaý júrginshi jolaǵymen ótip bara jatqan Nurgúl Turǵynbaevany kelip qaqqan. Sol kezde 5 metrge biraq ushqan Nurgúl, birden esten tanyp qalypty. Al, mynaý jaqyn mańdaǵy janarmaı beketinen túsirilgen taspa. Onda aq tústi kóliktiń kelinshekti qaqqany anyq kórinedi. Tek, tizginde bolǵan 2 azamat  jigittikke jat áreket jasady. Qyzdy “óldi” dep oılasa kerek, aýrýhanaǵa aparýdyń ornyna qoqysqa laqtyryp ketken. Ólim men ómirdiń ortasynda jatqan Nurgúldi keıin polıseıler taýyp alypty. “Barsaq, Qaskelenniń aýrýhanasynda jatyr eken. Reanımasıada, áli ózine kelmegen. Basy isip ketken. Bettiń bári syrylǵan. Qaqqan adam kóligin jaqyndata almaǵan. Soǵan deıin dyryldatyp tartyp aparǵan ǵoı”, – deıdi zardap shegýshiniń týysy Gúlsim Qarymbaeva. Nurgúl áli aýrýhanada jatyr. Birneshe kún es-tússiz jatyp, jaqynda ǵana tilge kelgen. Aıtýynsha apat bolatyn kúni qalaǵa tamaqtanýǵa bara jatypty. Al odan keıingisi esinde joq. Esinde eshteńe joq ekenin aıtady. Aýrýhanaǵa aýyr jaǵdaıda jetkizilgen 34 jastaǵy kelinshekke úsh ota jasalypty. Qazir adam qaǵyp, izin sýytqandarǵa qatysty 2 qylmystyq is qozǵalǵan. Tek, bir aı ýaqyt ótse de kináliler ustatpaı júr. Nurgúldi aq tústi “Honda Odısseı” qaqqan. Osy apatty kórgen bilgender bolsa, habarlassyn deıdi polıseıler. Apatqa kináli azamat quryqtalsa aýyr jaza kútip tur. Al Nurgúlge áli biraz ýaqyt em alý kerek. Dárigerler onyń aıaǵynan turyp ketýi úshin kemi jarty jyl ýaqyt qajet deıdi.