Qyzylordada jaǵa ustatarlyq jaǵdaı. Qaladaǵy №43 qazaq orta mektebiniń dene shynyqtyrý páni muǵalimi 2012-jyldan beri oqýshy qyzdarǵa qyrǵıdaı tıip, anaıy áreketter jasap kelipti.

Muny prokýrorlar aıtyp otyr. Eń soraqysy, 7-synypta oqıtyn qyzdar birneshe jyl boıy qorqynyshtyń qushaǵynda ómir súrip kelgen. Al muǵalimniń jymysqy áreketi jýyrda ǵana áshkere boldy. Qazir onyń ústinen qylmystyq kodekstiń “jas balalardy azǵyndaý” faktisi boıynsha is qozǵalyp, ol sotta qaralyp jatyr.

Ata-analardyń shaǵymyna saı qamaýǵa alynǵan muǵalimniń máselesi oblystyq kámeletke tolmaǵandar isi jónindegi aýdanaralyq sotta qaralyp jatyr. Proses jabyq esik jaǵdaıynda ótip jatqandyqtan oǵan qatysý múmkin bolmady. Al kúdiktimen júzbe-júz kezdesken ata-analar bolsa, sottan ashýly shyqty.

“Muǵalim bolyp, ishine kirip alyp, qyzdardyń ómirin oırandaǵan. Jalǵyz meniń nemerem emes. Jaýyp otyr, qaltasy qalyń, biz kedeımiz, bizdiń shamamyz kelmeıdi, “sender soqyrsyńdar” dedi bizge dırektor”, – deıdi jábirlenýshiniń ájesi.

Al muǵalimnen jábir kórdik dep otyrǵan oqýshy qyzdar búginde úreımen ómir súrip jatyr.

“Shalbaryn sheship uıatsyz shetin kórsete bastady. Uıatsyz shetin ustap turyp, oń qolyn esikten shyǵardy da, qolyńdy ber dedi. Men qorqyp, artqa qaraı shegingen kezde. Aıbol esimdi jańadan kelgen muǵalim kirip qaldy. Ólimniń ózi az shyǵar oǵan. Sebebi ol birneshe qyzdy solaı qorlaǵan”, – deıdi jábirlenýshi.

Oqý jylynyń basynda bolǵan bul oqıǵany 14 jastaǵy qyzdyń anasy kesh estigen. Ondada atalmysh mekteptiń muǵalimderi basshylarynyń ústinen quqyq qorǵaý organdaryna shaǵym túsirgen kórinedi. Sonda qyzyna jasaǵan aıýandyq áreket baıandalǵan eken. Tártip saqshylarynyń aýzynan estigende “júregim syzdady”, – deıdi Gúlzat.

Endi “dene shynyqtyrý pániniń muǵalimi ǵana emes, qyzymnyń bolashaǵyna beıjaı qaraǵandar túgel jazalansyn”, – deıdi ol.

Eger muǵalimder jazyp, eki mılısıa kelmese, men bilmeımin, qyzymnyń aldaǵy ómiri ne bolatynyn da

“Dırektor osynda otyra beredi ma, sol orynǵa laıyq pa? Bul bilim oshaǵy pedagogtar, muǵalimder, bilmeımin bári ómirin eshqandaı oılamaǵan. Maǵan eger muǵalimder jazyp, eki mılısıa kelmese, men bilmeımin, qyzymnyń aldaǵy ómiri ne bolatynyn da Qudaı biledi. Ádildik qaıda, sonda sender meniń qyzymdy jylatyp qoıdyńdar, anasyńdar”, – deıdi jábirlenýshiniń anasy Gúlzat Áljanova.

Atalmysh mekteptiń dırektory shý shyqqan boıda qyzmetkeriniń aryz jazyp, jumystan óz erkimen ketkendigin aıtty. Ázirge qalalyq bilim bólimi de únsiz. Olar sot úkimi shyqqannan keıin ǵana mán-jaıdy túsindirmek nıette. Tek biletinimiz, bilim ordasynyń basshysyna qatań sógis jarıalap úlgeripti. Al qylmystyq istiń barysymen prokýrorlar bólisti.

“№43 orta mekteptiń dene tárbıesiniń muǵalimi 2012-2013 jyldary osy mekteptiń 7-synyp oqýshysy, ıaǵnı 14 jasqa tolmaǵan A.Sh degen azamatqa qatysty ıntelektýaldyq sıpatta jáne kúsh qoldanýsyz azǵyndyq áreketterin jasaǵan. Sonymen qatar bul dene tárbıesi muǵalimi osy is áreketterin 2014 jyly da osy mekteptiń 7-synyp oqýshysy A.Á-ǵa qatysty jasaǵan derekteri anyqtaldy”, – deıdi Qyzylorda oblystyq prokýratýrasynyń basqarma prokýrory Asqat Áblázov.

Endi bul istiń sońǵy núktesin sot qoıady. Al muǵalimniń kinási dáleldense, kem degende 7 jylyn túrmede ótkizip, 20 jylǵa deıin pedagogtyq qyzmetimen qosh aıtysýy múmkin. Prokýratýranyń málimetinshe, bul bıyldyń úsh aıynda tirkelip otyrǵan tórtinshi fakti, al byltyr 11 jasóspirim osyǵan uqsas jaıttyń qurbany bolǵan.