Jol polısıasyna 1000 teńge para bergeni úshin júrgizýshige 400 myń teńgege jýyq aıyppul salyndy. Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttigi habarlady.

Sonymen, Jambyl oblysy Qordaı aýdany boıynsha aýdanaralyq qurylymy boıynsha aýdannyń 26 jasar turǵynyna qatysty Ákimshilik quqyq buzýshylyq týraly Kodeksi boıynsha 676-babyna sáıkes ákimshilik quqyqbuzýshylyq anyqtaldy.

Atap aıtqanda, bul turǵyda “Jeke tulǵalardyń memlekettik fýnksıalardy oryndaýǵa ýákilettik berilgen tulǵalarǵa nemese olarǵa teńestirilgen tulǵalarǵa zańsyz materıaldyq syıaqy, syılyqtar, jeńildikter berýi ne qyzmetter kórsetýi, eger bul áreketterde qylmystyq jazalanatyn is-áreket belgileri bolmasa, – eki júz aılyq eseptik kórsetkish mólsherinde aıyppul salýǵa ákep soǵady”.

Ákimshilik jaýapkershilikten jaltarý úshin quqyqbuzýshy Qordaı aýdandyq İİB qyzmetkerine 1000 teńge kóleminde aqshalaı syılyq usynǵan.

Qordaı aýdandyq sotynyń qaýlysymen quqyqbuzýshy ákimshilik jaýapkershilikke tartylyp, 200 aılyq eseptik kórsetkish kóleminde 396 400 teńge aıyppul salyndy. Sot májilisinde kináli óz qateligin tolyqtaı moıyndap, jibergen qateligi úshin ókinishin bildirdi.

Aıta keteıik, Jambyl oblysynyń sybaılas jemqorlyqqa qarsy qyzmetimen 2015 jyldyń 1 toqsanynda 6 ákimshilik quqyqbuzýshylyq anyqtaldy. Onyń ishinde tórteýi sybaılas jemqorlyq sıpatynda.