Mektep túlekterinen ulttyq biryńǵaı testileýge qatysýǵa ótinish qabyldana bastady. Astanalyq keıbir ata-ana “muǵalimder balamyzdy testileýge jibergisi kelmeıdi” degen shaǵym aıtty.

Astanadaǵy № 4 mekteptiń 11- synyp oqýshysy Ańsar Beısenbek bolashaq mamandyǵyn áli tańdamaǵan. Onyń ákesi Sársenbek Beısenbek balasyn “mektep basshylary ulttyq biryńǵaı testileýge (UBT-ǵa) jibergisi kelmeı otyrǵanyn” aıtyp shaǵymdandy.

“Ulym keremet oqıdy dep aıtpaımyn. Biraq daıyndyq testileýde 70 upaıǵa deıin alyp júr. Al mektep dırektory orynbasary “JOO-ǵa túskilerińiz kelse, Qazaq-Reseı ýnıversıtetine baryńyzdar, ol jerge UBT qorytyndysy qajet emes, atestatpen qabyldaıdy. Ulyńyz test tapsyra almaıdy jáne mekteptiń úlgerim kórsetkishin tómendetedi”, – degen jaýap aldym deıdi Sársenbek Beısenbek.

Biraq Sársenbek Beısenbek ózinen suraǵan [UBT tapsyrmaımyz degen] ótinishterin jazbaı ketip qalǵan.

Al bul mekteptiń dırektor orynbasary Aıgúl Qashaeva muny teriske shyǵardy. Onyń aıtýynsha, “Oqýshyǵa UBT-ǵa qatyspa” degen talapty eshkim qoıa almaıdy. Ondaıǵa mektep basshylyǵynyń, muǵalimderdiń quqyǵy joq”. Qashaevanyń aıtýynsha, UBT-ǵa baılanysty mektep ókilderi ata-analarmen kezdesý ótkize bastaǵany ras, biraq ondaǵy áńgimeniń mazmuny basqa.

Mektep basshylyǵynyń aıtýynsha, bıyl № 4 orta mektepti 96 oqýshy bitiredi. Olardyń deni UBT tapsyrmaq. Alaıda osy mekteptiń 11-synyp oqýshysy Serik Nurmaǵambetov Azattyqqa “test tapsyrmaıtynyn” aıtty.

Onyń sózine qaraǵanda, muǵalimder “UBT-ǵa qatyspa!” degen. Al oqýshynyń anasy Gúlbaqyt Nurmaǵambetova “muǵalimder ózin shaqyrtyp, balasynyń úlgerimi nashar ekenin, testileýden óte almaıtynyn eskertkenin” aıtady.

Qulaǵymdy jep qoıǵan soń test tapsyrmaý jóninde suraǵan ótinishin jazyp berip tynyshtaldyq

“Qulaǵymdy jep qoıǵan soń test tapsyrmaý jóninde suraǵan ótinishin jazyp berip tynyshtaldyq”, – deıdi Gúlbaqyt Nurmaǵambetova .

Astana mektepteriniń birinde alty jyl muǵalim bolyp eńbek etken Tynyshtyq Qydyrbaeva “úlgerimi nashar oqýshyny UBT-ǵa qatystyrmaý jaıynda mektep ishinde ata-anamen ońasha áńgime júretinin” jasyrmaıdy.

Onyń aıtýynsha, “ondaı áńgimeniń shyǵýyna mekteptiń UBT-dan shyǵatyn kórsetkishi kináli”. Túlekterdiń “kórsetkishi tómen bolsa, muǵalimder súıkimsiz atanyp, “ornyńnan ketesiń”, “kategorıańyz bir satyǵa tómendeıdi” degendeı sógis alyp, mektepti tekseretin komısıa jıileıdi” eken.

Alaıda Astana qalasy bilim basqarmasy orta bilim berý bólimi basshysy Botagóz Júnisovanyń sózine qaraǵanda, túlekter de, ata-analar da UBT-ǵa qatysý-qatyspaý týraly sheshimderin ózderi qabyldaıdy.

Biri “shetelde oqımyn”, endi biri “tapsyrmaımyn” dep ótinish jazyp tastaıdy. Sońynda biriniń shetelge aqshasy jetpeı qalady. Ekinshisi táýekelge bel baılap, test tapsyrmaq bolady. Al balasy mektepti bıyl bitiretin Sársenbek Beısenbek “UBT tapsyrmaımyn” degen ótinishti báribir jazbaımyn. Balam baǵyn synaıdy. Muǵalimderdiki durys emes. Mınıstr blogyna jazyp jiberdim” deıdi.