2019 jyldyń 1 qańtarynan bastap respýblıkadaǵy barlyq emhana men aýrýhana sheksiz qaǵazdardan qutylady. Bári elektrondyq formatta júzege asatyn bolady.
Elbasy halyqqa Joldaýynda medısınalyq qyzmettiń sapasyna erekshe kóńil bólip ótken. «Halyqtyń qalypty jaǵdaıy úshin medısınalyq qyzmettiń sapaly bolýy asa mańyzdy» degen edi Nursultan Nazarbaev. Medısınany sıfrlandyrǵannan elimiz ne utady? Densaýlyq saqtaý saqtaý júıesinde ne ózgeredi? Anyqtap kóreıik...
Medısınalyq qyzmettiń sapasyn arttyrýda eń aldymen elektrondy densaýlyq saqtaý salasyn damytý ári qujat almasý júıesin qaǵazdarsyz júzege asyrýdy damytý kerek. Osy oraıdaǵy jumystar belsendi júzege asyp jatyr.
Búgingi tańda medısınalyq qujattamanyń 121 formasynyń 64-i qaǵazsyz júıege engen. 727 táýelsiz medısınalyq uıymnyń 674-i qujattamany elektrondyq formatta júzege asyryp otyr. Al 2019 jyldyń 1 qańtarynan bastap memleket basshysynyń tapsyrmasyna oraı barlyq aýrýhana men emhana túgel qaǵazsyz júıege ótedi. Qazirgi tańnyń ózinde densaýlyq saqtaý uıymdarynyń 99 paıyzy medısınalyq aqparattyq júıemen jabdyqtalǵan, medısına qyzmetkerleriniń 90,8 paıyzy kompútermen jabdyqtalǵan.
Eldegi medısına salasyn sıfrlandyrýdyń kórinisi retinde Qostanaıdaǵy №4 qalalyq aýrýhanany keltirýge bolady. 2010 jyly «100 mektep, 100 aýrýhana» baǵdarlamasy aıasynda salynǵan emhana pılottyq rejımde belsendi jumys istep keledi.
Óziniń jeke serveri bar, ár qyzmetkerdiń jumys ústelinde kompúter ornalasqan. Ári emhana «Qaǵazsyz aýrýhana» jobasy aıasynda sheksiz qaǵazdardan bas tartqandardyń alǵashqysy boldy. Búginde emhanada qujattama elektrondyq formatta júzege asy jatyr. Dárigerge jazylý úshin pasıent úıden shyǵyp nemese telefon shalyp áýre bolmaıdy. DamuMed qosymshasy arqyly dárigerge jazylady, sonymen qatar dárigerdi úıge shaqyra alady.
Sonymen qatar, medısınalyq aqparattyq júıeniń arqasynda respýblıkadaǵy densaýlyq saqtaý uıymdarynyń bıznes-úrdisterin de sıfrlandyrý qamtamasyz etilgen. Buǵan qosa, elektrondyq densaýlyq pasporty úshin qajetti aqparat jınaý júıesi qalyptasty. Qazirdiń ózinde medısınalyq aqparattyq júıe óńirlik deńgeıde damyǵan, 10,2 mıllıonǵa jýyq densaýlyq saqtaý pasporty toltyrylǵan.
Sondaı-aq, 546-ǵa jýyq sıfrlyq saýattylyq posttary quryldy. Maqsaty – turǵyndardy sıfrlyq júıege úıretý, baýlý.
Munyń bári turǵyndardyń árqaısysy óz densaýlyqtaryna burynǵydan da qatty kóńil bólip, densaýlyq saqtaý qyzmetine degen senimderiniń nyǵaıýyna septesetin úrdister.
Densaýlyq saqtaý salasyn sıfrlandyrý men qujattamany qaǵazsyz júzege asyrý týrasynda sóz bolǵan kezde mobıldi qosymshanyń da róli mańyzdy ekenin eskere ketken jón. Bul týraly tolyq aqparat Qazaqstan Respýblıkasy Densaýlyq saqtaý mınıstrligi «Elektrondyq densaýlyq saqtaýdyń respýblıkalyq ortalyǵynyń» saıtynda kórsetilgen.
Búginde zamanaýı tehnologıanyń arqasynda osyndaı elektrondyq qyzmetter júzege asyp keledi.
