Óńir basshysy Berdibek Saparbaevtyń tóraǵalyǵymen ótken jıynda Aqtóbe oblysynyń osy jylǵy 11 aı ishindegi áleýmettik-ekonomıkalyq damýynyń qorytyndysy qaraldy.
Óńir eseptik kezeń ishinde qaryshtap damýyn jalǵastyrdy. Elbasynyń ekonomıka ósimin bes paıyzǵa jetkizý tapsyrmasy oryndaldy. Ekonomıka jáne búdjetti josparlaý basqarmasynyń basshysy Gúlqasıma Súıintaevanyń málimetine sáıkes óńdeý ónerkásibiniń ósimi 8,5%, aýyl sharýashylyǵy - 4,1%, qurylys - 7% quraǵan. 700 myń sharshy metrden astam turǵyn úı paıdalanýǵa berildi. Oblysqa tartylǵan ınvestısıa kólemi 422,8 mlrd teńgeni qurap, 12%-dy qurady.
Oblys ákimi: «Bizdiń mindetimiz – osy qarqyndy saqtap, Prezıdenttiń ekonomıka ósimin kem degende 5 paıyz deńgeıinde ósirý tapsyrmasynyń tolyq oryndalýyn qamtamasyz etý»,- degen tapsyrma qoıdy.
Berdibek Saparbaev sondaı-aq, búdjet qarajatynyń jumsalýyn qatań qadaǵalap, búdjettik baǵdarlamalardyń ákimshilerine, aýdandar men Aqtóbe qalasynyń ákimderine qarjylandyrý josparlaryna saı tolyq ári tıimdi ıgerýdi tapsyrdy.
Jıyn memleket basshysynyń halyq tabysyn arttyrý bastamasynyń Aqtóbe oblysynda júzege asyrylý barasyn qaraýmen jalǵasty. Budan buryn habarlanǵandaı, Prezıdenttiń eń tómengi eńbekaqyny 42,5 myń teńgege deıin kóterý tapsyrmasyn tıimdi oryndaý úshin oblysta ekonomıkanyń barlyq sektorlaryndaǵy eńbekaqy tóleýdiń aǵymdaǵy jaǵdaıyn taldaıtyn arnaıy jumys toby quryldy. Jumys toby tek ótken aıdyń ishinde aılyǵy 42,5 myńnan tómen 12 100 qyzmetkerdi qosymsha anyqtady. Nátıjesinde, aldyn ala málimetter boıynsha 2019 jylǵy 1 qańtardan bastap búdjet salasynyń 42 myńnan asa qyzmetkeriniń, sonymen qatar, jeke sektorda eńbek etetin 39 myńǵa jýyq adamnyń aılyǵy kóteriledi dep kútilip otyr.
Baıandamany tyńdap shyqqan oblys ákimi eńbekaqyny kóterý bastamasyna kiretin azamattardyń naqty sanyn anyqtaý jumystaryn jalǵastyrýdy tapsyrdy.
Atalmysh suraqty talqylaý kezinde óńir basshysy jumys berýshilerge jańa jyl aldynda syıaqy tóleý qajettigin atap ótti. Onyń pikirinshe, bul shaǵyn tólemder emes, salmaqty syıaqylar bolýy kerek. Aıta keteıik, oblys ákimdigi sondaı-aq, óńirdegi mekemeler men kásiporyndarǵa QR Táýelsizdigi kúnin merekeleý aldynda
qyzmetkerlerine syıaqy berýleri týraly túsindirý jumystaryn keńinen júrgizdi.
Budan basqa, «Nátıjeli jumyspen qamtý jáne jappaı kásipkerlikti damytý» baǵdarlamasynyń 11 aı ishinde júzege asyrylýynyń qorytyndysy talqylandy. Qazirgi tańda atalmysh baǵdarlama boıynsha jyldyq jospar bes paıyzǵa oryndalyp, 46 myńnan astam adam jumysqa ornalasty, - dedi jumyspen qamtý jáne áleýmettik baǵdarlamalar basqarmasynyń basshysy Qaırat Otarov.
Onyń aıtýynsha, bıylǵy qyrkúıek aıynan bastap 1085 adam tegin arnaıy orta bilim alýǵa kirisken. Budan basqa, qysqa merzimdi kásibı kýrstarǵa 2 300-ge jýyq jumyssyz tússe, olardyń 1674-i oqýyn aıaqtap, jumysqa ornalasqan. Baǵdarlama aıasynda qala men aýyldarda bıznes bastamalardy shaǵyn nesıeleý jumystary da belsendi júrip jatyr. Búginde 972 aqtóbelik bıznesin ashyp, damytý úshin jalpy somasy 4,4 mlrd teńge kóleminde shaǵyn nesıe alǵan.
