2019 jylǵy 1 qańtardan bastap memleket basshysynyń Qazaqstan halqyna joldaýynda berilgen tapsyrmasy aıasynda Aqtóbe oblysynyń 70 myńnan asa turǵynynyń aılyǵy ósedi.

Bul týraly oblys ákimdiginde óńir basshysy Berdibek Saparbaevtyń tóraǵalyǵymen ótken jıyn barysynda málim boldy.

Budan buryn habarlanǵandaı, Prezıdenttiń eń tómen eńbekaqy mólsherin 42,5 myń teńgege deıin kóterý týraly tapsyrmasyn tıimdi oryndaý úshin oblysta ekonomıkanyń barlyq sektorlaryndaǵy eńbekaqyny tóleýge qatysty aǵymdaǵy jaǵdaıyn taldaıtyn arnaıy jumys toby quryldy.

Nátıjesinde 42500 teńgeden az aılyq alatyn 70 myń adam anyqtaldy, olardyń 32 myńy búdjet salasynyń qyzmetkerleri. Máselen, bilim berý salasynda 25 myńnan asa qyzmetkerdiń eńbekaqysy ortasha alǵanda 48 myń 600 teńgege deıin kóteriledi dep kútilip otyr. Sondaı-aq, oblys boıynsha 15 872 jekemenshik kompanıa bar. Ol jerlerde aılyǵy 42 500 teńgeden az 39 myńǵa jýyq adam eńbek etedi.

Baıandamany tyńdap shyqqan oblys ákimi eń tómen eńbekaqyny kóterý týraly bastamaǵa kiretin azamattardyń naqty sanyn anyqtaý jumystaryn jalǵastyrýdy tapsyrdy.

- Bul óte kúrdeli suraq. Ony sheshý úshin formaldy túrde áreket etpeý kerek. Tek statısıkalyq málimetterge ǵana súıenbeńizder, istiń jaǵdaıyn sol jerde tekserińizder. 1 qańtardan bastap barlyq jumys berýshiler Elbasy tapsyrmasyn oryndaýlary qajet,-dep atap ótti Berdibek Saparbaev.