Aqtóbe ókildigi «Islam jáne otbasy» jyly aıasynda kezekti shara uıymdastyrdy.
Táýelsizdik merekesiniń tusynda «Jastyq» kafesinde otbasylyq otyrys ótti. Oǵan aqtóbelik din qyzmetkerleri, qala, aýdan meshitteriniń Bas ımamdary men medrese ustazdary januıalarymen birge qatysty. Balalarǵa deıin bólek dastarhan jaıylyp, merekelik kóńil-kúı esken berekeli basqosý boldy.
Ókil ımam Tólebı Ospan barshasyn Táýelsizdik kúnimen quttyqtap, ár shańyraqqa Alladan amandyq, bereke men tatýlyq tilep, duǵa etti. Barsha aqtóbelik din qyzmetkerlerine bıylǵy birlesip atqarǵan jemisti jumystarǵa rahmet aıtyp, rızashylyǵyn jetkizdi.
- 2018 jyl aqtóbelikter úshin Bas múftı Serikbaı qajy Satybaldyuly hazrettiń Aqtóbege jasaǵan saparymen aıshyqtaldy. Sapardyń nátıjesinde oblys ákimdigi men Qazaqstan musylmandary dinı basqarmasy, «Ýaqyp» korporatıvtik qory arasynda úsh jaqty memorandýmǵa qol qoıylyp, birlesken jobalarǵa jol ashyldy. Sonyń ishinde, aqtóbelik din qyzmetkerlerine áleýmettik qoldaý kórsetý máselesine erekshe mán artyldy. Qazirgi tańda jergilikti 26 ımamǵa «Ýaqyp» qorynan, 8 ımamǵa dinı basqarmanyń qajylyq qorynan qaıyrymdylyq kómek beriledi. Aqtóbelik 34 ımamnyń qosymsha jalaqylarǵa taǵaıyndalýy – siz ben bizdiń birlesip atqarǵan jumysymyzdyń jemisi, - dedi ókil ımam Tólebı Dádiluly. Sóziniń jalǵasynda ókil ımam atqarylǵan birqatar aýqymdy sharalardy atap ótti. Sonyń ishinde, bıyl Aqtóbe meshitteri 20 mln teńgeden astam qarajatqa qaıyrymdylyq kómek kórsetip, muqtaj otbasylarǵa 18 tonnaǵa jýyq azyq-túlik taratqan. 680 balany jańa oqý jylyna daıyndady. Dinı basqarma jarıalaǵan «Islam jáne otbasy» jyly aıasynda oblysta 30-ǵa jýyq ár túrli is-sharalar uıymdastyryldy.
- Búgingi otbasylyq basqosýdyń bir sebebi – ujym arasyndaǵy uıymshyldyqty ǵana emes, januıalar arasyndaǵy jarasymdylyqty, tatýlyq pen dostyqty nyǵaıtý. Siz ben bizdiń jumysta jemisti, tabysty bolýymyzdyń bir úlesi – úı ishindegi bereke men birlikte jatyr. Endeshe, sol otbasy qundylyqtarynyń qadirine jete bileıik. Keler jyl da jyl jaqsy da jańa bastamalarǵa toly, jemisti jyl bolǵaı dep tileımin, - deı otyryp, ókil ımam meshit qyzmetkerlerine Alǵys hattar tabys etti. Sondaı-aq, meshittegi ıgi isterge járdemshi bolyp júrgen janashyr jandar meshit alqasynyń mushesi Qanybek Jaqsylyquly men kásipker Rústem Amangeldiulyna da arnaıy alǵys jarıalap, kásipterine bereket tiledi.
Otyrys barysynda ulttyq oıyndar da ulyqtalyp, ımamdar gir kóterýden kúsh jarystyrdy. Bal tildi balǵyndar da bar bilimderin
ortaǵa salyp, suraqtarǵa jaýap berip, syılyq aldy. Dástúrli án-kúıden shashý shashylyp, dombyranyń qońyr úni kúmbirlegen keremet kesh boldy. Barlyq januıalarǵa estelik syılyqtar taratyldy.
