Búgingideı damyǵan aqparattyq tehnologıalar zamanynda ata-babamyzdan qalǵan yrymnyń astaryn bile bermesek te, olarǵa ishteı senip, kópti kórgen úlkenderdiń aıtqan sózinen attaǵymyz kelmeıtini ras. Úıge kirerde kidirip qalsań, "tabaldyryqta turma" deıtin qazaqı yrymnyń qandaı máni bar? Basqa ulttarda osyndaı senim bar ma? Qamshy.kz aqparat agenttigi osy suraqtarǵa jaýap izdep kórdi.

Halqymyzdyń san ǵasyrlyq tarıhı damýy barysynda ómirlik tájirıbe men senimniń, ártúrli ańyzdardyń nátıjesinde yrym-tyıymdar men nanym-senimder qalyptasty. Atalmysh yrym-tyıymdardy ustaný arqyly qandaı da bir jaqsylyqtyń bolatynyna, baqyt pen qýanysh ákeletindigine sengen. Qazaqta "tabaldyryqta turýǵa bolmaıdy", "tabaldyryqta baq turady" degen tyıym bar.  "Tabaldyryqtyń eki jaǵynda turyp qol alyspaıdy, ondaı jerde jaý bolatyn adamdar ǵana qol alysady",— dep sengen.

Al slaván halyqtarynyń senimi boıynsha tabaldyryq kıeli jer sanalady. Qandaı da bir zatty  tabaldyryq arqyly berseń, óz baqytyń men qýanyshyńdy bergeniń. Sondaı-aq, ejelgi dástúrleri boıynsha tabaldyryqtyń astyna qaıtys bolǵan adamdardy jerlegen. Kóbinese, úı janýarlary tabaldyryqqa kelgende kidiretinin baıqaǵan bolarsyz. Orystardyń senimi boıynsha mysyqtyń ózge álemmen qatysy bar. Eski senim boıynsha olar ólgenderdiń rýhyn kórgendikten tabaldyryqtan óterde kidirip qalady eken. 

Ýaqyt ótip, zaman ózgerdi, qazir tabaldyryq astyna adam jerlemeıdi. Dese de, ejelden qalyptasqan yrymǵa áli kúnge senip, qaýipten qorǵanatyndardyń qarasy kóp. Tipti, keıbireýler tabaldyryq astyna kıeli tastar men ártúrli músinderdi kómip jatady. Adamnyń senimi tabaldyryqtan ǵana emes, zaman aǵymynan ótse de, óz kúshin joǵaltpaıtyn qasıet ekenine taǵy kóziń jetedi.