Qazaqstan musylmandary dinı basqarmasy Aqtóbedegi meshitte er adamnyń qyz balaǵa bir túndik neke qıýdy usynǵan oqıǵaǵa baılanysty málimdeme jasady. 

Múftıat meshit – qulshylyq pen tárbıe ordasy ekenin atap ótti.

"Onda kelgen árbir azamat ózin ádeppen, izetpen ustaýǵa mindetti. Islam sharıǵatynda ózgege til tıgizý, orynsyz sóz aıtý, ásirese áıel zatyna qolaısyz pikir bildirý – musylman ádebine saı kelmeıtin jáne aıyptalatyn is-áreket. Qazaqstan musylmandary dinı basqarmasy Aqtóbedegi oqıǵada qyz balaǵa orynsyz sóz aıtqan azamattyń áreketin aıyptaıdy. Óıtkeni mundaı áreket musylmandyqqa jat, ári adamgershilik qaǵıdattaryna da saı emes", delingen QMDB-nyń resmı málimdemesinde. 

Aıta keteıik, oqıǵa 24 shildede Aqtóbe qalasyndaǵy «Nur Ǵasyr» meshitinde bolǵan. Er adam namaz oqyp shyǵyp kele jatqan qyz balaǵa ádepsiz sózder aıtyp, bir túndik neke qıýdy usynǵan. 

29 shildede sot ótip, er adam bes kúnge qamaýǵa alynǵan.