Búgin, 28 shilde kúni Aqtaýdaǵy «Jyly jaǵajaı» aýmaǵynda «Taza Qazaqstan» jalpyulttyq ekologıalyq aksıasy aıasynda jappaı senbilik uıymdastyryldy. İs-sharaǵa Mańǵystaý oblysy ákiminiń orynbasarlary, Aqtaý qalasynyń ákimi, komýnaldyq qyzmet ókilderi, memlekettik qyzmetshiler, «Jasyl el» eńbek jasaǵy men jastar atsalysty.
Tazalyq jumystaryna komýnaldyq sala mekemelerimen qatar ózge de uıymdardan barlyǵy 400-ge jýyq qyzmetker men 4 arnaıy tehnıka jumyldyrylyp, nátıjesinde 12 tonna turmystyq qaldyq shyǵaryldy.
Oblys ákiminiń orynbasary Tilegen Ábishev aksıa barysynda óńir turǵyndary men demalýshylardy ekologıalyq mádenıetti qalyptastyrýǵa, tabıǵatqa uqypty qaraýǵa shaqyrdy.
"Búgingi senbiliktiń basty maqsaty - Kaspıı teńizi jaǵalaýyn qoqys qaldyqtarynan tazartyp, halyq arasynda demalys mádenıetin qalyptastyrýǵa úndeý. Ókinishke qaraı, sońǵy ýaqytta jaǵalaýda qoqys qaldyrý derekteri jıilep ketti. Kúni keshe ǵana bul aýmaqqa 8 myńǵa jýyq kólik pen 30 myńnan astam adam kelip, demaldy. Alaıda kópshiligi demalystan keıin artynda qaldyqtaryn jınamaı, sol kúıi tastap ketken. Sonyń saldarynan eriktilermen birge taý-taý bolyp jınalǵan qoqysty ózimiz jınap júrmiz. Qazirgi tańda jaǵalaýdaǵy tazalyqty saqtaý úshin komýnaldyq qyzmettiń 80-ge jýyq mamany jumys isteýde. Degenmen, demalýshylardyń sońynan qoqys qaldyrýy áli de toqtar emes. Arnaıy qoqys jáshikteri ornatylǵanyna qaramastan, keıbir azamattar 50 qadam jerdegi konteınerge baryp qoqysyn tastaýǵa barmaı otyr. Ekologıalyq aksıa - bir kúndik shara emes, bul baǵyttaǵy jumys jyl boıy jalǵasady. Osy rette barsha halyqty tabıǵatty aıalaýǵa, ekologıalyq mádenıetti qalyptastyrýǵa shaqyramyz", - dedi Tilegen Ábishev.
Aıta keteıik, 2023 jyly Mańǵystaý oblysyna 390 myńǵa jýyq týrıs kelgen bolsa, ótken jyly bul kórsetkish 420 myńǵa jetken. Al bıylǵy shomylý maýsymynda óńirge 500 myńnan astam demalýshy kelgen.
Resmı málimetterge sáıkes, bıyl tabıǵatty qorǵaý polısıasy tarapynan tabıǵı aýmaqtardy lastaǵany, qoqys qaldyrǵany jáne ruqsat etilmegen jerlerde ekologıalyq quqyqbuzýshylyqtar boıynsha 1000-ǵa jýyq ákimshilik hattama toltyrylyp, jalpy somasy 70 mıllıon teńgeden astam aıyppul salynǵan.
Mańǵystaý oblysy ákiminiń baspasóz qyzmeti
