Saýd Arabıasy koróldigi 2025 jyldyń 29 sáýiri men 10 maýsymy aralyǵynda zańsyz jáne vızasyz qajylyq jasaǵan, sondaı-aq olarǵa kómektesken adamdarǵa da tyıym salynatynyn málimdedi.

Qazaqstan musylmandary dinı basqarmasynyń Qajylyq bóliminiń málimetinshe, Saýd Arabıasy qajylyqty zańsyz oryndap jatqan nemese oǵan áreket etken shetel azamattaryna qatysty birqatar qatań sharalardy qolǵa alǵan.

Qajylyq vızasy joq shetel azamattary Mekke men qasıetti oryndarǵa kirgen jaǵdaıda, olarǵa 20 myń Saýd Arabıasy rıaly (shamamen 2 691 499 teńge) kóleminde aıyppul salynady. Al olardyń saparyn basqa vızalarmen uıymdastyrǵan tulǵalarǵa 100 myń rıalǵa deıin (13 508 278 teńge) aıyppul qarastyrylǵan. Bul aıyppul árbir zańsyz kelgen azamatqa jeke-jeke esepteledi.

Sondaı-aq, zańsyz qajylyq jasaǵan azamattardy jasyrǵandar, kólikpen tasymaldaǵandar, qonaq úıge nemese jeke úılerge ornalastyrǵandarǵa da dál osy kólemde aıyppul salynady.

Budan bólek, zańsyz qajylyq jasaǵandar deportasıalanady jáne olarǵa 10 jyl boıy Saýd Arabıasyna kirýge tyıym salynady. Eger zań buzǵandardy tasymaldaǵan kólik olardyń óz menshiginde bolsa, sot sheshimimen memleket menshigine ótkiziledi.

Vıza merzimi aıaqtalǵan soń elden shyqpaǵan shetel azamattaryna 50 myń rıal (shamamen 6,8 mln teńge) kóleminde aıyppul salynyp, 6 aıǵa deıin qamaýǵa alý jáne deportasıa jazasy qarastyrylǵan.

Saýd Arabıasy 2025 jyly 1,8 mıllıon qajyny qabyldaýdy josparlap otyr. Osyǵan baılanysty qajylyq tek arnaıy qajylyq vızasy arqyly ǵana ruqsat etiledi. Basqa vıza túrlerimen Mekke men qasıetti jerlerge kirýge qatań tyıym salynǵan.

2024 jyly Saýd Arabıasyna ózge vızalarmen kelip, qajylyq rásimin zańsyz oryndaǵan 300 myńnan astam sheteldik anyqtalǵan. Osy sebepti 2025 jyldyń 29 sáýiri men 9 maýsymy aralyǵynda birneshe elder úshin elektrondy vıza berý ýaqytsha toqtatyldy.