"QazAvtoJol" ulttyq kompanıasy QR Kólik mınıstriniń m.a. 2025 jylǵy 22 sáýirdegi № 133 buıryǵyna sáıkes 2025 jylǵy 13 mamyrdan bastap respýblıkalyq mańyzy bar "Shý-Býrylbaıtal" avtomobıl jolynyń 92,2-268 shaqyrym aralyǵyndaǵy ýchaskesi aqyly bolatynyn málimdedi.

Aqyly jol ýchaskesiniń jalpy uzyndyǵy 175,8 shaqyrym, İİ-sanat, ótý jolaǵynyń eni keminde 3,75 metr, eki baǵytta bir jolaq.

Balama tegin jol "Shý – Qaınar – Kenen – Qarabastaý – Qansheńgel – Aqsúıek – Býrylbaıtal" avtomobıl joly arqyly usynylady.

Bul ýchaskede jeńil kólikter úshin tólem alynbaıdy. Al avtobýstar men júk kólikteri úshin aılyq jáne jyldyq abonement usynylady. Ol úshin 1403 baılanys ortalyǵyna habarlasý qajet.

Sondaı-aq tólemdi keıingi nemese aldyn ala tóleýge bolady. Júrgizýshilerge yńǵaıly bolý úshin ekinshi deńgeıli bankter arqyly onlaın tólem qarastyrylǵan.