Astanadaǵy ákimdik ǵımaratynda ne bolyp jatyr? Bul suraqqa jaýapty memlekettik mekemede qarapaıym qyzmet atqaryp júrgen Juldyzaı Aıanqyzy berip otyr. Ol "Januıa" otbasy ınstıtýtyn qoldaý ortalyǵynda oryn alǵan bassyzdyqty áshkerelep, qala basshylyǵyna – ákim Jeńis Qasymbek pen tıisti mınıstrlik ókilderine ashyq úndeý joldady. Aıtýynsha, mekeme ishindegi jemqorlyq pen klandyq basqarý júıesi beleń alyp, oǵan qarsy shyqqan qyzmetkerler qýdalanady.
"Jumys istemeıtinder jalaqy alyp otyr"
Juldyzaı Aıanqyzynyń málimetine súıensek, ortalyqta jumysqa tirkelgenimen, múlde kelmeıtin «ótirik qyzmetkerler» tizimi bar. Bul "qyzmetkerlerdiń" basym bóligi — dırektordyń týystary, býhgalterdiń qurbylary, dırektor orynbasarynyń kúıeýi men ákimshilikke jaqyn adamdar t.b.
Juldyzaı Aıanqyzynyń aıtýynsha, bul zańbuzýshylyq tek "Januıa" ortalyǵymen shektelmeıdi. Sol sıaqty Mansap ortalyǵy men basqa da basqarý qurylymdaryna da tanys-tamyr arqyly kirip alǵandar bar. Bul — búdjettik qarajattyń ashyq túrde tonalýy degen sóz.
Al munyń bárin áshkerelemek bolǵan Juldyzaı Aıanqyzynyń ózi qazir qýdalaýǵa ushyraýda. Bul – memleket qyzmetkeriniń adal eńbegi men azamattyq ustanymy úshin jazalanýy. Ári ádiletti qoǵam ornatamyz degen bıliktiń betine shirkeý.
Ákim Jeńis Qasymbek qaıda qarap otyr?
Ákimdik búdjetinen qarjylandyrylatyn, halyqqa qyzmet kórsetýi tıis mekemeler klandyq klýbtarǵa aınalyp bara jatsa, Astana ákimi nege únsiz? Qala ákiminiń mindeti – qaladaǵy júıeni ádil basqarý. Al qazirgi jaǵdaı – "Astana – sybaılastyqtyń astanasyna" aınalyp bara jatqanyn kórsetip tur.
Búdjet esebinen jalaqy alyp, jumys istemeıtin "adamdardy" tirkeý – ulttyq resýrstardy urlaý. Bul – qylmys. Mundaı júıeni búrkemeleý – tek qana ákimdiktiń emes, ortalyq bıliktiń de bedeline nuqsan keltiredi.
Jemqorlyqpen kúres – tek sóz júzinde emes, naqty áreketpen dáleldenýi kerek. Bul úndeýge jaýap bermes buryn, Astana ákimi Jeńis Qasymbek myrzanyń tek kabınettegi baıandamalarmen shektelmeı, qarapaıym qyzmetkerlerdiń de ýájine qulaq asyp, olardyń máselesine tereńirek úńilgeni oryndy bolar edi. Áıtpese, Astananyń ádemi kelbeti – ádiletsizdiktiń boıaýymen jýylyp, el seniminen túbegeıli aıyrylady.
