Aýyl sharýashylyǵy mınıstri Aıdarbek Saparov Qazaqstan Qytaıǵa jer berip jatyr degen qaýesetterge qatysty kezekti ret túsinikteme berdi. Úkimet otyrysynan keıin ótken brıfıńte jýrnalıser mınıstrdiń ózinen estýdi talap etip:

«Jelide Qazaqstan Qytaıǵa keń kólemde jer beredi degen aqparat áli de tarap júr. Osyǵan qatysty naqty jaýap berseńiz», – dep saýal qoıdy.

Mınıstrdiń jaýaby qysqa  boldy:

«Bul – feık. Eshqandaı jer berilip jatqan joq. Muny Jer resýrstary komıteti baqylaýda ustap otyr. Jer kodeksine saı sheteldikterge jer jalǵa da, menshikke de berilmeıdi. Ózimizdiń sharýalar jumys istep jatyr».

Alaıda qoǵamda bul málimdemege senim az. Óıtkeni buǵan deıin de resmı ýádeler men shynaıy áreketter arasynda alshaqtyqtar baıqalǵan. 2016 jylǵy Jer máselesine qatysty jappaı narazylyqtar halyqtyń bul taqyrypqa nege sonshalyqty sezimtal qaraıtynyn kórsetip bergen edi.

Mınıstrdiń "bári baqylaýda" deýi kóńilge medeý bola ma? Álde bul – tek ýaqytsha tynyshtandyrý ma? Halyq naqty ashyq aqparat pen tolyq esepti talap etedi, qurǵaq ýádeni emes.