Halyqaralyq izdeýde júrgen "Astana LRT" kompanıasynyń eks-basshysy Talǵat Ardan Túrkıanyń Antalá qalasynda ustalyp, Qazaqstanǵa deportasıalanbaq. Bul týraly Ulttyq qaýipsizdik komıteti (UQK) resmı túrde habarlady.
Qazaqstan Bas prokýratýrasy 2019 jyldyń qyrkúıeginde Túrkıanyń ádilet mınıstrligine Ardandy ekstradısıalaý týraly suraý joldaǵan bolatyn. Osyǵan oraı, Túrkıanyń quqyq qorǵaý organdary izdestirý sharalaryn bastaǵan. Bıyl UQK Ardannyń naqty qaıda jasyrynǵanyn anyqtap, ony Túrik tarapy Antaláda qolǵa túsirdi.
9 mamyrda Antalá qalasynyń soty ony Qazaqstanǵa qaıtarý týraly sheshim shyǵaryp, qazirgi tańda Ardan qamaýda otyr. Qazaqstannyń quzyrly organdary eks-sheneýnikti elge jetkizýge qatysty quqyqtyq rásimderdi bastady.
Eske salsaq, Talǵat Ardan "Astana LRT" jobasyna qatysty sybaılas jemqorlyq isi boıynsha syrttaı sottalǵan bolatyn. 2023 jyldyń 3 mamyrynda Astananyń qylmystyq ister jónindegi aýdanaralyq soty ony kináli dep tanyp, memlekettik qyzmette laýazym ıelený quqyǵynan ómir boıyna aıyryp, 9 jylǵa bas bostandyǵynan aıyrý týraly úkim shyǵardy.
Astana LRT isi – eldegi eń daýly ınfraqurylym jobalarynyń biri. Qoǵam men buqaralyq aqparat quraldary tarapynan synǵa ushyraǵan bul istiń tergeýi uzaqqa sozyldy. Endi onyń basty fıgýranty Qazaqstan sotynyń aldynda jaýap bermek.
