17 qańtar kúni Almaty qalasynda Naýryzbaı aýdanyndaǵy «Alataý» sanatorıasynyń aımaǵyna tikushaq qulady. Alty adamǵa arnalǵan tikushaqta jalǵyz pılot qana bolǵan, apatty jaǵdaıdan keıin ol aýrýhanaǵa barar jolda qaza tapty. Marqum ushqyshtyń jasy 50-de eken jáne ómiriniń jartysyn ushqysh qyzmetine arnaǵan, dep habarlaıdy Qamshy.kz aqparat agenttigi Eýrazıa birinshi arnasynyń málimetine súıene otyryp.

Belgili bolǵanyndaı, ushqysh jeke tapsyrys boıynsha ushyp shyqqan. Atalmysh oqıǵaǵa baılanysty tergeý isi bastaldy. Apatqa ushyraǵan tikushaq 2017 jyly Fransıa qalasynda qurastyrylǵan, búginde ol tikushaqtyń bir saǵaty 590 myń teńge turady eken.

“Sky Servise” kompanıasy atalmysh tikushaqqa arnaıy sertıfıkaty bar tehnıkıkalyq ortalyq qyzmet kórsetip otyrǵanyn jáne únemi ushar aldynda tekseristen ótkiziletinin aıtty.

17 qańtar kúni keshkilik Almaty qalasynda qoıý tuman bolyp, sonyń saldarynan birneshe reıs keıinge shegerilgen bolatyn. Alaıda bul apat aýa raıyna qatysty ma, álde joq pa,  ol jaǵy áli belgisiz.

Qaza tapqan ushqysh Valentın Shıtovty áriptesteri "óz isiniń mamany edi" dep eske aldy. Olardyń aıtýynsha, ushqysh óte kóńildi, pozıtıvti adam bolǵan. Valentın Shıtov Saratov qalasynda áskerı-ushqysh ýchılıshesin támamdap, óziniń eńbek jolyn Atyraýda bastaǵan, keıinnen shekara qyzmetine aýysqan, bes jyl buryn marqum azamattyq avıasıa salasyna kelgen.

«Biz jaqsy tanys boldyq, ózi deneli, boıshań bolatyn. Únemi kóńildi bolyp, kúlip júretin, meıirimdiligimen adamdardy ózine baýrap alatyn qasıeti boldy. Qazir endi men birtúrli jaman kúıde otyrmyn...» - deıdi marqumnyń áriptesi Stalbek Álimqulov.

«Bul – óte aýyr qaza. Valentın uqypty, dostarymen jáne áriptesterimen óte jaqsy qarym-qatynasta bolatyn. Biz dosymyzdan aıyryldyq, biz úshin orny tolmas qaıńy boldy. Barlyq jaqyndaryna, týǵan-týystaryna qaıǵyra kóńil aıtamyn», - dep aıtyp ótti áriptesi Valerıı Sevastánov.

Jergilikti turǵyndar áleýmettik jelide tikushaqtyń daýysyn estigenderin jáne qoıý tuman bolǵandyǵyn aıtty. Sonymen qatar, olar marqum Valentın Shıtovty tikushaqty adamy joq  qaýipsiz jerge qaraı buryp, sumdyq apattan qutqaryp qalǵan batyr" dep atady.