Búkil jurtshylyqtyń qabyrǵasyn qaıystyrǵan taǵy bir qaıǵyly jaǵdaı - elimizge belgili zańger Abzal Quspannyń 5 jasar qyzy kóz jumdy. Búldirshin osy ýaqytqa deıin Ystambul qalasynda emdelip, birneshe kún buryn oǵan ota jasalǵany belgili. Barsha qazaq eleńdep, jaqsy habar kútken edi, amal neshik... Qazaly jaǵdaıǵa baılanysty Dúnıe júzi qazaqtarynyń qaýymdastyǵy Abzal Quspanǵa qaıǵyra kóńil aıtady.

"Belgili zańger, elimizde quqyqtyq qoǵam qurýymyzǵa úlken úles qosyp júrgen qoǵam qaıratkeri, jer týraly zań jobasynyń kemeldenýine, ózge de kóptegen ózekti máselelerdiń ońtaıly sheshim tabýyna, ásirese qandastarymyzdyń zańdyq, qujattyq, áleýmettik máselesinde aıanbaı atsalysyp kele jatqan ult janashyry Abzal Quspannyń qyzy Aıǵanymnyń mezgilsiz ómirden ótýine baılanysty qaıǵyryp kóńil aıtamyz. Halqymyzdyń, "atam-aılatyp jylatsa da, botam-aılatyp jylatpasyn" degen ataly sózi bar. Taǵdyrdyń salǵan salmaǵyn qaıyspaı kóteretinińe senemiz. Árıne, tas túsken jerine aýyr, mezgilsiz ushqan perishteń shapaǵatshyń bolsyn, jaratýshy ıemiz bergenin alsa da, bererin almasyn, bekem bol, Abzal Temirǵalıuly" - delingen habarlamada.