Kúnkóristiń qamymen Qazaqstanda júrip, sosyn Qyrǵyzstan asqan qaraqalpaq azamaty Baǵdatbaı Ismaılov Ózbekstannyń prezıdenti Shavkat Mırzeevke áleýmettik jeli arqyly úndeý jarıalady (tolyq nusqasy tómende-red).

–Men Ózbekstandaǵy Qaraqalpaq avtonomıalyq Respýblıkasynyń Qaraózek aýdanyndaǵy Qaraózek sovhozynyń azamatymyn. Ultym - qaraqalpaq. Aty-jónim –Baǵdatbaı Ismaılov. Men Qaraqalpaqstanda jumystyń joqtyǵynan 2010 jyly Qazaqstanǵa bala-shaǵamdy alyp ketýge májbúr boldym.  Óıtkeni bizdiń elde jumys joq. Kún kórý qıyn. 2017 jylǵa deıin Qazaqstannyń qoqys polıgonynda  jumys istedim. 2017 jyly ol elde júrý múmkin bolmaǵannan keıin Qyrǵyzstan astym. Qazir osy eldemin. Qyrǵyzstanda qashyp júrmin,  bala-shaǵam Qazaqstanda qaldy.

Shavkat Mırzıeev, myna ómirge biz qashý úshin kelgenimiz joq qoı. Qaraqalpaqstanda jumys joq. Al sen aýylǵa baryp «mynany istep jatyrmyn» dep, ótirik aıtyp, saıraısyń.Túk istep jatqan joqsyń! Sen halyqty kedeı etip, Qaraqalpaqstannan qańǵyrtyp jiberdiń. Men endi týyp ósken Otanyma bara almaı otyrmyn. Barsam, is qozǵaıdy. Men erkin azamatpyn! Erkin ómir súrýim kerek, Shavkat! Mynaý ne degen sumdyq, ne degen jaǵdaı Shavkat! Urdyńyz, óltirdińiz, bárin... Endi namysymyzǵa tıip jatyrsyz! Etten ótip, súıekke tireldi... Jeter! Biz qaı zamanda ómir súrip jatyrmyz?! Sen bolsań, ótirik aıtyp bylshyldaısyń. Boldy toqtat, shydamnyń da shegi bar Shavkat! Sharshattyń, tozdyq biz. Meniń túrime qara, 37 jastamyn. 50 jastaǵy adam sıaqtymyn. Boldy, Shavkat! Qashanǵa deıin halyqty qorlaısyń! Seni aǵa deýge bolatyn edi, biraq oǵan da turmaısyń. Sheshem 55 jasynda pensıaǵa shyqty. Pensıasy – 200 myń som (9100 teńge-red). Bul nege jetedi, Shavkat! Óziń shamaly oılanshy, ol nege jetýi múmkin?! Seniń restoranǵa baryp, bir obed ishýińe de jetpeıdi. Shydamnyń da shegi bar, Shavkat. Biz de adambyz! Týyp ósken elimizge bara almaı qaldyq.  Dıýana boldyq qoı, Shavkat! Ózbekstan bizdi dıýanaǵa aınaldyrdy. Ótirik emes, aqıqat bul! Bizge Qaraqalpaqstannyń azattyǵy, táýelsizdigi kerek. Sóz bostandyǵy kerek!».

Qaraqalpaq azamatynyń prezıdent Shavkat Mırzeevke arnaǵan úndeýin  jan tebirenbeı tyńdaý múmkin emes. Rasynda da bul Ózbekstandaǵy qazirgi qoǵamnyń shynaıy kórinisi. Basqa bermesin. Janyń, júregiń aýyrady.

...Múmkin onyń janaıqaıyn siz de tyńdap kórersiz!