Erekshe áýezdi únimen kelinderdi ata-anasynyń bosaǵasynan attatyp, óz shańyraǵyna qadam bastyrǵan, ósıetin án arqyly jetkizgen qazaqtyń aıaýly ánshisiniń basyna qara bult úıirildi. «Aq kelin», «Kelinge ósıet», «Oralshy mahabbat», «Jazyǵym ne?» ánderiniń oryndaýshysy Gaýhar Álimbekovaǵa «alaıaq» degen aty jaman qylmys tańylyp, 6 jylǵa sottalyp kete bardy.
«Jazyǵym ne, men áli túsinbeımin...
Bar ma álde jazǵan bir isim deımin?»
Óziniń oryndaýyndaǵy bul áni arqyly taǵdyrǵa suraý salyp edi?! Endi, mine, jazyqty atanyp otyr. Dál qazir Gaýhar Álimbekovanyń ánderin tyńdap otyrmyn. «Júzi jylydan túńilme» degen qazaq. Óziniń júzi qandaı jyly bolsa, ánderi de jyly bul ánshige «qylmysker» degen ataýdy jaba salý biz sekildi, sizge de ońaı emesine senimdimin.
Birinshiden «alaıaq» degenimiz kim? Bir emes, birneshe adamdy san soqtyrǵan, ár adamnan myńdaǵan, mıllıondaǵan aqsha jınap alyp, ózi shetelge taıyp turǵandardy, tek óz paıdasyn kózdegenderdi qoǵam «alaıaq» dep tanıdy. Olardyń jazasy da aýyr bolýy tıis. Sebebi shyn maqsattary – jurtqa paıdam tıse dep emes, aqshalaryn alyp, ózim baıysam degen aram nıetti alǵa tartady.
Al derekterge súıensek, Gaýhar Álimbekova qurbysyna kómekteskisi keldi de, ózi de ózge bireýge aldanyp qaldy. Maqsaty – oljaly bolý emes edi, KÓMEKTESÝ! Muny advokaty Jumaǵalı Zeınelov ta óz málimdemesinde rastady.
♦Gaýhar Álimbekovanyń advokaty istiń mán-jaıyn túsindirdi
Qazaqqa belgili aqyn, jýrnalıs Eseı Jeńisuly Fcaebook jelisindegi paraqshasynda Gaýhar Álimbekovanyń ónerde ǵana emes, ómirde de adal ekenin jazdy.
«Gaýhar ápkemdi «Jas Alashqa» jumysqa turǵan 1998 jyldan beri biletindikten, onyń tabıǵatyn túsinetindikten, birneshe ánine soavtor bolyp birge jumys istep kórgendikten, aıaýly ánshini "qylmysker" dep ataýǵa qımaımyn.
Qatelesken bolar, zańnyń ádil saltanat quryp, shyn alaıaqtyń aqsha alǵany dáleldenetinine sengen bolar. Qalaı degende de, jyǵylǵan ústine judyryq jumsaýdyń qajet emes ekenin aıtqym keledi.
Gaýhardyń biz biletin álemi - qıanattan ada. Aqsha bergen adammen arasynda túsinispeýshilik bolmaǵany anyq ańǵarylady, biraq jónsiz kústánalamaıyq. Ónerge adal qazaqtyń bir qyzy bolsa, ol Gaýhardyń ózi», - dep ánshige qoldaýyn kórsetti.
Muny bar qazaq ta bilip otyr, ásirese, ánshini jaqsy tanıtyn áriptesterine bul jaǵdaı aıan. Osy tusta, «Gaýhardy aqtap almasa, qazaqtyń beldi ánshilerine syn» degendi alǵa tartqym kelip otyr.
Osydan 6-7 jyl buryn Super Star jobasy arqyly tanylǵan Qaırat Túntekov te isti bolǵan edi. 2012 jyly eshkim zardap shekpegen jol apatyna sebepker bolǵan ánshi úsh jylǵa deıin kólik aıdaý quqyǵynan aıyrylyp, 40 kún túrmege otyryp shyqty. Bul kezde de halyq dý etti, Qaırat úshin ánshilerden, bılikten kómek surady. Ókinishtisi, eki taraptan da bul ótinishke jaýap bolmady. Áleýmettik jelide sózben belsendilik tanytqan ánshiler iske kelgende osal boldy. Derekterge súıensek, Qaırat Túntekovten sot talap etken moraldyq shyǵynnyń jartysyn da jınap bere almady. Qaırat tolyǵymen jazasyn ótep shyqty, esesine ónerdiń bıiginen qulady, abyroıyna nuqsan keldi. Sahnaǵa basyn tiktep shyǵýy tıis Qaırat áli de qara pıardyń naq ortasynda. Tipti bir suhbatynda «sahnaǵa qaıta oralmaımyn» dep málimdegen edi.
Endigi kezek Gaýhar Álimbekovaǵa keldi me? Qazaǵymnyń ánshilerine qara kúıe jaǵýdan aýlaqpyn. Alaıda ánshilerdiń birliginiń bar-joǵy osyndaıda bilinedi. Aýyzben aıtýǵa, jazýǵa bárimiz shebermiz. Tek aıtqandy ispen kórsetý bir basqa. Kesheli beri áleýmettik jelide belsendilik tanytyp jatqan ánshilerdi kózimiz shalyp, rıza boldyq. Endi sony ispen dáleldep, Gaýhardy túrmeden shyǵaryp alýǵa atsalysýdy mindetim dep túsinse eken, bul qazaq.
Jigit aǵasy atanyp, ónerdiń tórinde otyrǵan «Mýzarttan» bastap, halyqtyń súıikti ánshileri Qaırat Nurtas pen Tóreǵalı Tóreáli bastaǵan top bir toılarynyń aqshasyn qıyp berse, áriptesteriniń abyroıyn da saqtap qalar ma edi?!
Derekkózderge sensek, Qaırat Nurtastyń eń joǵary stavkasy – 10 myń dollar, eń keminde 7-8 myń dollar alady. Tóreǵalı Tóreáliniń de tabysy osynyń aınalasynda. Budan ózge tanymal ánshilerdiń bir toıdan alǵan tabysy bir kóliktiń qunyna teń. Al qazaqta kim kóp, ánshi kóp.
«Kóp túkirse kóldi» kórsetip, kóz aldarynda júrgen áriptesterine ol ánshiler osylaı qoldaý kórsetse ıgi.
Gaýhar Álimbekovany «sútten aq, sýdan taza» dep aqtap alýdan aýlaqpyz. Bılikke jalbarynyp, kómek suraýdan taǵy aýlaqpyz. Úsenov sekildi qylmys isteýge áýesterdi, úlken kólemde para alsa da, bılikti aqshamen qarq qylǵan Vasılıı Nılerdi qorǵaǵan sot qorǵansyzdarǵa kelgende qaıyrymsyz ekenin qarapaıym halyq jaqsy biledi.
Dókeılerdiń ǵana jaǵdaıyn jasaıtyn bılik onsyz da bar, al qorǵansyz qazaq bolsa, halqynan ózge eshkimge arqa súıeı almaıdy. Endeshe, ispen dálelde, qazaq!
Gúlim Jaqan
