Alaıaqtyq úshin 6 jylǵa bas bostandyǵynan aıyrylǵan ánshi Gaýhar Álimbekovanyń advokaty Jumaǵalı Zınelov istiń jaı-japsaryn aıtyp berdi dep jazady Qamshy.kz aqparat agenttigi Tengrinews.kz saıtynyń deregin negizge alyp. Advokat sot úkimimen kelispeıtinin jáne taıaý arada apelásıalyq sotqa aryz túsiretinin málimdedi.
"Halyq bilýi úshin oqıǵanyń mán-jaıynan bastaıyn. Bul 2013 jyly bolǵan is. Almaty qalasyndaǵy Raıymbek dańǵylynyń boıyndaǵy "Aqkent" turǵyn úı kesheninde túrik kompanıasy úı salǵan. Ony istiń fıgýranty Ferýza Ordabaeva ákimdikte isteımin ári memlekettik baǵdarlamamen 3 bólmeli páterlerdi 40 myń dollarǵa alyp beremin dep, 35 adamdy aldaǵan. Solardyń ishinde ánshi Gaýhar Álimbekova da bar. Ordabaeva Álimbekovanyń talaı konsertterine baryp, súıip tyńdaıtyn jankúıeri bolǵan, sońy tanystyqqa ulasqan. Sóıtip, ekeýi qurby bolǵan. Álimbekova sol alaıaq qurbysynyń usynysynan keıin úsh týysynyń atynan úsh bólmeli 3 páter alǵan", - dep áńgimeledi ol.
Alǵannan keıin bir jyldaı ýaqyt turǵannan keıin, advokattyń sózinshe, eski tanysy, qurbysy Baqyt Nazarova ánshiniń úıine qonaqqa kelgen. Osy kezde Nazarova onyń úıine qyzyǵyp, ózi de satyp alǵysy keledi. Osylaısha, ol da Ordabaevamen tanysyp, úıge 40 myń dollar aqsha beredi. Sóıtip, bir aıdyń ishinde Nazarova baspanaly bolady. Ánshi Álimbekova men aryzdanýshy Nazarova ekeýi bir podezde turǵan.
Al ýaqyt óte kele bul úı negizi kelisimshart boıynsha bólip tóleýge satyp alynatyn, quny áldeqaıda qymbat úı bolyp shyǵady.
"Sonda alaıaq áıel bul ekeýin bastapqy jarna retinde 600 myń teńgesin tólep, bir jylǵa úıge kirgizip qoıǵan da, qalǵan aqshasyn qoldy qylady. Úı alyp, máz bolyp júrgende eki jyldan keıin bulardy baspana salýshy kompanıa qýyp shyǵady. Sóıtse, úıdiń quny 37 mıllıon bolyp shyǵady. Úıdi alǵan kezde aldanǵandar munyń bólip tóleý arqyly satyp alynatyn baspana ekenin kelisimshartta oqymaǵan. Alaıaq tólep bergen eki jyl boıy olarǵa eshkim tıispegen de, osy ýaqyt ótkennen keıin úı salýshy kompanıa bulardan aı saıyn 250 myń teńgedeı soma tólep turý kerek deıdi. Aldanǵandar osy kezde ǵana esin jıyp, alaıaqty qurbany bolǵanyn túsinedi. Sóıtip, Álimbekova da, onyń qurbysy Nazarova da, olarmen birge osylaısha úıli bolǵan taǵy 35 adam dalada qalady", - deıdi advokat.
Osydan keıin, Zınelovtyń aıtýynsha, zardap shekkender alaıaqty izdep, sotqa aryz jaza bastaıdy. Bul kezde ánshi Gaýhar Álimbekova shyǵarmashylyq adamy bolǵandyqtan sharýasy kóbeıip, aryz jazbaı qalǵan.
"Iaǵnı bul iste ánshiniń ózi zardap shegip otyr jáne bir emes, úsh birdeı úıdiń aqshasynan aıyrylyp otyr. Arada ýaqyt ótkende, 2016 jyly Almaty qalasynyń Almaly aýdandyq soty qylmystyq istiń basty fıgýranty Ferýza Ordabaevany sottap, ony 7 jylǵa bas bostandyǵynan aıyrady", - deıdi advokat. 2017 jyldyń sońyna deıin aqshasyn ánshiden kútken Baqyt Nazarova shydamy taýsylyp, Gaýhar Álimbekovanyń ústinen aryz túsiredi. Bul sot isi boıynsha otyrys ótip qoıǵan bolsa da, jańa zardap shegýshi paıda bolǵandyqtan, is qaıta kóterilip, endi Ferýza Ordabaevamen birge sot aldyna Álimbekova da keledi. Memlekettik aıyptaýshy Álimbekovany Ordabaevamen birge alaıaqtyq jasady dep, ıaǵnı jábirlenýshi Nazarovany Ordabaevamen tanystyrdy jáne jolyqtyrdy dep, Qylmystyq kodekstiń 190-baby, ıaǵnı "Alaıaqtyq" boıynsha aıypty dep tanýdy, sóıtip, segiz jylǵa bas bostandyǵynan aıyrýdy suraıdy. Bul ne degen sumdyq? Birde bir tıyn paıda kórgen joq, jaqsylyq jasaıyn dep tanystyrǵany úshin isti bolýy kerek pe?", - dep narazylyǵyn bildirdi advokat.
Nazarovanyń araz-talaby boıynsha sot keshe, 2019 jyldyń 30 qantar kúni istiń eki fıgýrantyna qatysty úkim shyǵarady. Ol úkim boıynsha, Ferýza Ordabaeva Qazaqstan Respýblıkasy Qylmystyq kodeksiniń 190-babynyń 4-bóliginiń 2-tarmaǵynda kórsetilgen qylmysty jasaýda kináli dep tanylyp, oǵan 6 jyl 8 aı merzimge bas bostandyǵynan aıyrý túrindegi jaza taǵaıyndalǵan. QR "Qazaqstan Respýblıkasy Táýelsizdiginiń jıyrma bes jyldyǵyna baılanysty raqymshylyq jasaý týraly" 2016 jylǵy 13 jeltoqsandaǵy Zańynyn 4-babynyń 1-tarmaǵy 2-tarmaqshasynyń jartysyna deıin qysqartylyp, oǵan túpkilikti túrde 3 jyl 6 aı merzimge bas bostandyǵynan aıyrý túrindegi jaza taǵaıyndalǵan. Al Gaýhar Álimbekova sot úkimimen alty jylǵa bas bostandyǵynan aıyrylǵan.
Osylaısha, advokattyń aıtýynsha, bul iste úkim óte jyldam ári mán-jaıyn anyqtamaı jatyp shyǵarylǵan. "Men aıyptaý aktisi qate shyǵarylǵan dep esepteımin. Gaýhar Álimbekovanyń bul iste kinási, paıda kórgeni, aram pıǵyly bolǵany birde-bir epızodta dáleldenbegen dep esepteımin. Onyń ústine ózi aldaǵysy kelgen adamǵa ózimen kórshi úıdi alyp bere me? Bul logıkaǵa jatpaıdy ǵoı", - dep qorytyndylady advokat sózin.
Eske salaıyq, elimizge tanymal ánderdiń avtory, ánshi Gaýhar Álimbekova 30 qańtarda alaıaqtyq úshin 6 jylǵa bas bostandyǵynan aıyrylǵan bolatyn.
Aıta keteıik, ánshiniń "Aq kelin", "Kóktemge hat", "Jas kelin", "Qyz sezimi", "Oralshy mahabbat", "Aqmaralym" ánderi jurtshylyqqa keńinen taralyp, tanymal bolǵan. Onyń ánine jazylǵan óleńderdi tanymal estrada juldyzdary oryndaǵan.
