2001 jyly aqyn, jýrnalıs Shómishbaı Sarıev teatr rejıseri Ázirbaıjan Mámbetovten suhbat alǵan. Suhbatynda rejıser Muhtar Áýezovpen bolǵan estelikteri jaıly aıtyp berdi. Suhbattan úzindini áleýmettk jeli qoldanýshysy Áset Aqmolda Facebook-tegi paraqshasyna jarıalady. 

Umytpasam, 1959 jyly Qaltaı Muxamedjanovtyń "Bóltirik bórik astynda" spektaklin qoıdym. Ózim osy spektákldegi Arystan rólin oınaǵanmyn. Bul komedıaǵa dán rıza bolǵan Muxań - Muxtar Áýezovtiń jyly lebizdi batasyn alǵanmyn.

Ol kezde jaspyz, jas júrek batyl keledi, tákapparlyq ta joq emes. Qoryqpaı, Muxańnyń "Aıman-SHolpan" pesasyn qolǵa aldym. Oqysam, birshama qaıtalaýlar bar eken. Astyn qyzyl qaryndashpen syzyp oqydym. Qyzyl boıaý menmundalap badyraıyp tur. Sóıtsem, Muxtar "Jas rejıser ne istep jatyr?" dep bireýlerden suramaı ma, olar aıtypty: "Jas rejıser Sizdiń qoljazbańyzdy qyzyl qaryndashpen olaı da bulaı syzǵylap oqyp jatyr", - dep jetkizgen ǵoı. Bir kúni Muxańnan "kelip ketsin" degen xabar keldi. Qoljazbany ózgertetin ýaqyt joq. Basqa, almastyra qoıarlyq danasy bolmaǵasyn, amal joq, alyp bardym.

Muqan Tólebaev kóshesindegi úıine barsam, Taqań - Taxaýı Axtanov otyr eken, "Qalaı?" dedi Muxań. "Bári durys, Seri-aǵań, El-aǵań kómektesip jatyr dedim. Sosyn, qoljazbany suraǵasyp: "Osyndaı-osyndaı qaıtalaýlar bar eken, Muxa", - dedim. "Jaraıdy, tastap ket", - degen qatqyldaý jaýap aldym. Bet-dıdary alaı-dúleı, júzi - sýyq. Tez qutylǵanyma qýanyp, syrtqa shyqqansha asyqtym.

Kóp uzamaı taǵy shaqyrtyp jatyr dedi. Dem-tynysym tarylyp, "ne der eken" degen kúdikpen bardym. Taǵy da, Taxań otyr, Valentına Nıkolaevna bar. Muxań júzi jadyrap, mańdaıy jazylǵandaı. Muxań: "Qarap shyqtym, az-kem qaıtalaýlar bar eken. Osy kúıinde qolǵa al", - dedi. Júregim ornyna túsip, jyly sózine qanattanyp qaldym. Aıman rólinde – Zámzágúl Sháripova, Sholpan rólinde – Sholpan Jandarbekova oınaıtyn boldy. Bárinen qıyny, bul spektákldegi "Kótibar" esimi. Ony bárimiz kelisip "Basybar" dep ózgerttik.

Uly ókinish, "Aıman-SHolpan" spektakliniń premerasyn Muxań kóre almady... Zámzágúl Sháripova da, Sholpan Jandarbekova da rejıser retinde men de "Muxań óz kózimen kórse eken" dep armandaýshy edik.