Kúnshyǵys elinde qyz bala jetige kelgende arnaıy tigilgen kımono kıedi de, beli tuńǵysh ret obımen (kımononyń jalpaq beldigi) tańylady. Balalarǵa arnalǵan dástúrli ǵuryptyq sharalardyń qatarynda naýryzdyń úshi kúnine belgilengen qyz balalarǵa arnalǵan hınamasýrı men mamyrdyń besindegi er balalar merekesi bar. Úshinshi aıdyń úshinshi juldyzynda japondar búldirshin qyzdardyń ádemi bop ósýin, bolashaqta baqytty bolýyn tileıdi. Dinı mańyzy bar osy  momono sekký, ıakı hınamasýrı kúnine arnap qyz ósirip otyrǵan ár otbasy úıdegi arnaıy orynǵa naýryz týǵanǵa deıin ejelgi hanzadalar men hanshaıymdar, samýraılar, t.b. úlgisindegi ulttyq qýyrshaqtardy qoıý kerek. Qýyrshaqtardyń ornalasý retiniń de máni bar. Jeti satydan turatyn «qýyrshaqtar ordasynyń» eń joǵarǵy jaǵynda «ata  qýyrshaq» pen «ana qýyrshaq» ornalasady. Al eń tómengi eki satyǵa qyz balany qyzyqtyratyn aına, shaı demdeý rásiminiń quraldary, ıne shanyshqysh, t.b. qoıylady. Jalpy hınamasýrı ǵana emes, japonnyń barlyq ulttyq merekelerinen eýropalyq nemese basqa shet elden shyqqan zatty kórmeısiz. Hınamasýrı qýyrshaqtarynyń keskin kelbeti men kıimi, saqal-murty men shash úlgisine deıin  japondyq ekenin aıshyqtap  turady. Hınamasýrı kúni ótken soń qýyrshaqtardy jınap tyǵyp qoıady da  kelesi jyly naýryz týarda qaıta shyǵarady. Qýyrshaqtar ordasy bezendirilgen kúıi naýryzdyń úshinen keıin de tura beretin bolsa sol úıdiń qyzy óskende otyryp qalady degen yrym bar. Iaǵnı, qýyrshaqtar naýryzdyń úshine deıin ǵana turý kerek. Odan keıin neǵurlym uzaǵyraq jınalmaı tursa qyzdyń bolashaqta teńin tabýy soǵurlym kesheýildeıdi dep oılaıdy japondar.   Mýshánıngıoý — batyr qýyrshaq. Er balalarǵa arnalǵan besinshi aıdyń besinshi juldyzynda atap ótiletin ǵuryptyq mereke osyndaı atqa ıe. Bul kúni ul tárbıelep otyrǵan japondar balasy bolashaqta samýraıdaı erjúrek bolýy úshin  rásimdik ǵuryptarǵa qatysady.   Sharafat Jylqybaeva