Búgin Almatydaǵy Shet tilder jáne iskerlik karera ýnıversıtetinde Elbasy Nursultan Nazarbaevtyń «Qazaqstan-2050» strategıasy men «Nurly jol» joldaýyn qoldaýǵa arnalǵan halyqaralyq sımpozıým bastaldy. Halyqaralyq oqý ornynyń on jyldyq mereıtoıymen qatar ótkizilip otyrǵan alqaly basqosýǵa Qazaqstan, Túrkıa, Qyrǵyzstan, Reseı, Úndistan, Katar, Ýkraına, t.b. memleketterden ǵalymdar men laýazymdy ókilder shaqyrylǵan. Jıynnyń saltanatty ashylýynda Shet tilder jáne iskerlik karera ýnıversıtetiniń rektory, doktor, profesor Sabrı Hızmetlı baıandama jasap, oqý ornynyń on jylda asqan asýlary jóninde esep berdi. Túrkıa Respýblıkasynyń Almatydaǵy Bas Konsýly Sýphı Atan eki el arasyndaǵy dıplomatıalyq yntymaqtastyqtyń damý qarqyny týraly baıandady. Qazaqstan Respýblıkasy Ultyq ǵylym akademıasynyń Prezıdenti, akademık Murat Jurynov qazaq-túrik ýnıversıtetteriniń qurylý tarıhyna toqtala kele, Qazaq handyǵynyń 550 jyldyǵyna tuspa-tus kelgen Shet tilder jáne iskerlik karera ýnıversıtetiniń mereıtoıyna oraı uıymdastyrylǵan bul sımpozıým túrki birligin pash etýi kerektigin atap ótti. Murat Jurynov ýnıversıtet rektory Sabrı Hızmetlıdi QR Ulttyq ǵylym akademıasynyń Qurmet gramotasymen marapattady. Budan keıin, TIKA basqarmasynyń tóraǵasy Serdar Cham, Qazaqstan Ǵalymdar odaǵynyń Prezıdenti, akademık Orazáli Sábden, Q.A.Iassaýı halyqaralyq ýnıversıtetiniń tóraǵasy, doktor, profesor Mýsa Iyldyz sóz alyp, qazaq-túrik yntymaqtastyǵynyń ár qyryna toqtaldy. Jıynnyń ashylý saltanatynda Manas atyndaǵy ýnıversıtettiń, Atatúrik atyndaǵy ýnıversıtettiń, Hıtıt, Kastamoný, Turan ýnıversıtetteriniń, Kıev ekonomıkalyq ýnıversıtetiniń, Pamýkkale ýnıversıtetiniń, T.Júrgenov atyndaǵy Ulttyq óner akademıasynyń, Qyrǵyz ekonomıkalyq ýnıversıtetiniń, Stambul ýnıversıtetiniń, Qazan ekonomıka jáne quqyq ýnıversıtetiniń, Djeveharlal ýnıversıtetiniń, Bahavalpýr ýnıversıtetiniń rektorlary baıandama jasady. Úsh kúnge sozylatyn sımpozıým «Almaty: Islam mádenıeti astanasy», «Orta Azıa Islam mádenıeti men órkenıeti», «Túrki halyqtarynyń ulttyq jáne rýhanı qundylyqtary», «Orta Azıa túrki oıshyldary, ǵulamalary jáne memleket qaıratkerleri», «Túrki dúnıesiniń birtutastyǵy jáne ortaq mádenıet salasyndaǵy problemalary», «Qazaqstan Respýblıkasy Shet tilder jáne iskerlik karera ýnıversıtetine 10 jyl», «Almatylyq tulǵalar: memleket, qoǵam, óner qaıratkerleri» degen seksıalar boıynsha júrgizilýde.
Sondaı-aq búgin Shet tilder jáne iskerlik karera ýnıversıtetiniń jańa ǵımaratynyń saltanatty ashylý rásimi ótti. Dıplomatıalyq mekemelerdiń basshylary men qalalyq ákimdik ókilderi, tanymal ǵalymdar men oqytýshylar qatysqan jıynda ýnıversıtet dekany Ulan Abdykalykov 2015-2016 oqý jylynda joǵary bal jınaǵandarǵa 105 grant bólingenin atap aıtty. Oǵan qosa bıyl kúndizgi bólimge túskenderge túgeldeı 10 % jeńildik beriledi. Bul ýnıversıtette stýdentter az degende 3 shet tilin meńgerip shyǵady eken. Keıbir mamandyqtar aǵylshyn tilinde oqytylady. Jaqsy oqyǵan stýdentter Túrkıa men Qytaıdaǵy oqý oryndarynda grant negizinde stıpendıa alyp, oqýyn jalǵastyrady. Barlyǵy on úsh mamandyq boıynsha bilim beretin ýnıversıtette UBT-dan 80-85 bal alǵandarǵa 15% jeńildik, 86-90 bal bolsa 20 % , 90-99 bal alǵandarǵa 25%, 100 bal jáne odan joǵary bolsa 50% jeńildikter belgilengen. «Altyn belgi» ıeleri tórt jyl tegin oqytylady. Jetim balalar, kóp balaly otbasynan shyqqandar men múgedekterge arnaıy jeńildikter berilgen. Aýyldan kelgen stýdentter úshin úsh mezgil tamaqpen qamtamasyz etilgen jataqhana bar. Ýnıversıtette Qazaqstandyq dosent, profesorlarmen birge Amerıka, Túrkıa, Qytaı, Arab memlketterinen kelgen oqytýshylar jumys isteıdi. Órisi jyldan jylǵa keńeıip kele jatqan halyqaralyq oqý ornynyń dekany Ulan Abdykalykov bıyl UBT tapsyra almaǵan jastardy «Halyqaralyq foundation» baǵdarlamasyna qatysýǵa shaqyrdy. Saltanatty shara barysynda Almatydaǵy Shet tilder jáne iskerlik karera ýnıversıtetimen áriptestik ornatqan Túrkıanyń Kastamoný, Pamýkkale, Stambul, t.b. shet eldik JOO-nyń basshylary on jyldyǵyn toılap otyrǵan atalmysh oqý ornynyń úzdik stýdentterine Túrkıada oqýǵa arnalǵan granttardy tapsyrdy. Sharafat Jylqybaeva
