Cúıinshi suraýǵa sál erte, degenmen suraı berýge de bolady...

Búgin Májiliste «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» Zań jobasyn talqylaýǵa arnalǵan Jumys tobynyń segizinshi otyrysy boldy.

Qazaqstan Respýblıkasynyń 2011 jylǵy 22 shildeden beri qandastarymyzdyń turaqty tirkeýge turýyna eń basty kedergi bolyp kelgen Kóshi-qon zańynyń «Kóship kelýshilerge Qazaqstan Respýblıkasynda turaqty turýǵa arnalǵan ruqsatty berýden bas tartý ne onyń kúshin joıý úshin negizder» degen 49-babyna ózgeris engizildi.

Atap aıtar bolsaq, «aýyr nemese asa aýyr qylmys jasaǵany úshin sottalǵandyǵy bolǵan» degen 9) tarmaq «Qazaqstan Respýblıkasynyń aýmaǵynda aýyr nemese asa aýyr qylmys jasaǵany úshin alynbaǵan nemese ótelmegen sottalǵandyǵy bar» dep ózgertildi. G.Seıitmaǵambetova, A.Smaıyl, G.Ishımbaeva, N.Sabılánov qatarly tórt depýtat usynǵan bul ózgertýdi Jumys tobynyń ózge de músheleri tegis qoldady. «Eger, osy ózgeris qabyldansa, kelgen elinen «sottylyǵy» týraly anyqtama suraýǵa negiz joq bolady» dedi İshki ister mınıstrliginiń ókili Sabyrjan Seıitjanov.

Aldaǵy jerde Senattan ótip, Elbasy qol qoıyp jatsa, Atajurtqa oralyp, Qazaqstan azamaty atanǵysy keletin qazaqtar «Sottylyǵy» týraly anyqtamanyń azabynan qutylary sózsiz.

Sonymen birge, aldyńǵy maqalamyzda aıtylǵan usynystar da jan-jaqtyly pysyqtalý ústinde.

Mysaly, bilim alý maqsatymen kóship keletin etnıkalyq qazaq jastaryna Qazaqstanda alynatyn synaqtarǵa úlgerý úshin shetelden vıza ashtyrǵanda basymdyq berilse degen usynysty Syrtqy ister mınıstrliginiń ókilderi negizsiz dep qaraýda. Vıza alýda kezektiń bar ekenin de joqqa shyǵarmaıdy taǵy. Sebep, qoldanystaǵy qyzmet standarttary men qaýlylarynda mundaı tártip joq eken.

Biraq, SİM ókilderiniń osy Zań jobasy qoldanysqa engen kúnnen bastap, qatysty Qaýly ataýlynyń da jańartylatynyn eskergenderi jón edi.

Árıne, nezizsiz talapty biz de usynbaımyz, depýtattar da qoımaıdy. Eń basty negiz – Elbasymyz Nursultan Nazarbaevtyń «Jastar – bizdiń bolashaǵymyz. Bizdiń álemdegi barsha qazaq jas­tarynyń sapaly bilim alýyna tıisti jaǵdaı jasaýymyz qajet. Qazaqstanda biz ony júzege asyramyz. Osyǵan baılanysty Bilim jáne ǵy­lym mınıstrligine qandastarymyzǵa bólinetin granttyq kvotany naqtylap, jastarmen júıeli jumys júrgizýdi tapsyramyn» (Dúnıejúzi qazaqtarynyń 4-quryltaıy) degen sózin qaperlerine almaı otyrǵany qynjyltady.

Ol az deseńiz, «Bilim týraly» Qazaqstan Respýblıkasynyń Zańynyń 66-babynda «1. Qazaqstan Respýblıkasynyń azamattary bolyp tabylmaıtyn ulty qazaq adamdardyń Qazaqstan Respýblıkasynda bilim alýǵa quqyǵy bar. 2. Memleket shet eldegi qazaq dıasporasynyń bilim alý qajettilikterin qanaǵattandyrýǵa járdem­desedi» dep ashyq jazylǵan.

Endi sol jastardyń oqý merzimine úlgerip kelý ishin oqýǵa baratynyn aıtyp, ótinish bildirýine, oǵan SİM Konsýldyq departamentiniń sheteldegi ókildikteri kómektesýine ábden bolady ǵoı...

Sondyqtan, kelesi otyrysta bul máseleler de sheshimin tabady dep senemiz.

Aýyt Muqıbek

Astana

11.06.2015