Kúres túrlerinen Nur-Sultanda ótip jatqan álem chempıonatynda Qazaqstan balýany Dáýlet Nıazbekov erkin kúresten kúmis medal alyp, 2020 jyly Tokıoda ótetin Olımpıadaǵa joldama jeńip aldy dep jazady Qamshy.kz aqparat agenttigi.

65 kılogramda synǵa túsken Nıazbekov fınalda reseılik balýan  Gadjımýrat Rashıdovqa bir mınýttyń ishinde 11:0 esebimen ese jiberdi.

Nıazbekov alǵashqy aınalymda Chan Iýı-Súandy (Qytaılyq Taıpeı) 10:0 esebimen, germanıalyq Aleksandr Semısorovty 12:8 esebimen, shırek fınalda mońǵolıalyq Temer-Ochırın Týlgany 6:2 esebimen jeńdi. Al jartylaı fınalda úndistandyq, byltyrǵy álem chempıonatynyń kúmis júldegeri Badjrang Pýnıadan (Úndistan) basym tústi. Bul beldesý 9:9 esebimen teń aıaqtaldy. Biraq kezdesý kezinde Nıazbekov tórt upaılyq ádis jasaǵany úshin jeńimpaz dep tanyldy. Al jartylaı fınalda Nıazbekov osy salmaqtaǵy álemdik reıtıń kóshbasshysy Badjrang Pýnıany (Úndistan) jeńgen.

30 jastaǵy Qyzylorda oblysynyń týmasy Dáýlet Nıazbekov 2013 jylǵy álem chempıonatynyń qola júldegeri. Ol úsh ret Azıa chempıony atanǵan jáne 2012 jyly London Olımpıadasyna qatysqan. 

Kúres túrlerinen Nur-Sultandaǵy álem chempıonaty 22 qyrkúıekte aıaqtalady. Nıazbekovtyń kúmisin bólek, Qazaqstan quramasyda bir kúmis, úsh qola medal bar. Kúmisti grek-rım kúresinen Qorlan Jaqansha ıelense, qolany Almat Kebispaev, Meırambek Aınaqulov (ekeýi de - grek-rım kúresi) jáne Valentına Islamova (áıelder kúresi) aldy. 

Búgin erkin kúreste Nurıslam Sanaev (57 kılogram) qola júldege talasady. Al erteń 70 kılogramda kúresetin Nurqoja Qaıpanov fınalda beldesedi.

Sońǵy ret Qazaqstan balýandarynyń arasynan Armenıadan kelgen lıgıoner Mhıtar Manýkán 1999 jyly Afınada ótken álem chempıonatynda Grek-rım kúresinen altyn alǵan bolatyn. Qazaqstan sportshylarynyń arasynan sodan beri eshqandaı balýan álem chempıonatynyń altynyn alǵan joq.