Memleket basshysynyń ústimizdegi jyldyń aqpan aıynda Úkimetke bergen tapsyrmasyn oryndaýǵa sáıkes jasalǵan Sharalar josparynyń 87-bóligin oryndaý maqsatymen Ulttyq bank turǵyndardyń ıpotekalyq qaryzdaryn «aıryqsha kezeńde» qaıta qarjylandyrý baǵdarlamasyn bekitken bolatyn. «Qaıta qarjylandyrý» (refınansırovanıe) degenniń bul jerdegi maǵynasy – qaryzdy qaıtarý sharttaryn qaıta qaraý degenge saıady.
Bul baǵdarlamanyń maqsaty boryshkerlerdiń qalyń tobyna ıpotekalyq qaryzdaryn qaıtarý shartyn múmkindiginshe jeńildetý bolatyn. Baǵdarlamanyń qamtýyna 2004 jyldan bastap 2009 jylǵa deıingi merzimde ıpotekalyq qaryzben turǵynúı alǵandar engizilgen. Qazir osy jeńildikti alý úshin halyq ózderi nesıe alǵan banktardyń esigin tozdyrýda. Al endi banktyq operasıalar jasaý quqynan aırylyp, lısenzıasy qaıtyp alynǵan «BTA-Ipoteka» AQ jáne «Astana-Fınans Ipoteka» AQ sıaqty qarjylyq uıymdardan nesıe alǵandar osy jeńildikti paıdalaný úshin qaıda barýy kerektigin bilmeı dal bolýda eken.
Qaıda bararyn bilmegen olardyń birazy ózderiniń quqyqtary men múddelerin qorǵaýdy ótinip «Qazaqstannyń Halyqtyq komýnıser partıasy» Keńsesiniń esigin tozdyrǵan kórinedi. Bul týraly Májilistiń búgingi, sońǵy plenarlyq otyrysynda depýtat Aıqyn Qońyrov jarıalap, osy azamattardyń jeńildik alýyn sheship berińiz dep Ulttyq Banktyń tóraǵasy Qaırat Kelimbetovtyń atyna depýtattyq saýal joldady.
Joǵaryda atalǵan uıymdardyń banktyq operasıalar jasaý quqynan aırylǵanyna tutynýshylar kináli emes. Kezinde olar da Ulttyq banktan lısenzıa alyp, jumys istep turdy, sondyqtan halyq olarǵa senip, nesıe aldy. Demek, halyqtyń bul jerde eshqandaı kinási joq, sondyqtan olardy jeńildik alý quqynan aıyrmańyz delingen saýalda.
Sonymen qatar depýtat ózine belgili bolǵan derekterge qaraǵanda qazir sot oryndaýshylar kóptegen osyndaı boryshkerlerdi shyryldatyp, sottyń sheshimimen jalǵyz úılerinen qýyp shyǵyp jatqanyn aıtty. Al eger Úkimettiń jeńildigin qoldansa, olardyń birazy qaryzdaryn óteý múmkindigine ıe bolar edi deıdi depýtat. Sondyqtan osy eki uıymnan ıpotekalyq nesıe alǵandardyń jeńildikke qol jetkizý tetikterin tez arada jasaýyńyzdy ótinemin delingen saýalda.
Bul saýalǵa A.Qońyrovpen birge Májilistegi QHKP fraksıasynyń barlyq músheleri qol qoıdy.
Serik Eleý, sarapshy
